جەتىسۋ وبلىسىنىڭ قۇتقارۋشىلارى جارتاستان قۇلاپ كەتكەن بالىقشىعا كومەك كورسەتتى، دەپ حابارلايدى Almaty-akshamy.kz جەتىسۋ وبلىسى تجد باسپا ءسوز قىزمەتىنە سىلتەمە جاساپ.
2023 جىلعى 13 قازان كۇنى ساعات 18.20-دا تجد قۇتقارۋشىلارىنا الاكول اۋدانىنداعى ىرگايتى وزەنىنىڭ جاعاسىندا ادام جارتاستان قۇلاپ، وزدىگىنەن شىعا الماي جاتقانى تۋرالى حابارلاما كەلىپ ءتۇستى. تجد جەدەل - قۇتقارۋ جاساعىنىڭ قۇتقارۋشىلارى دەرەۋ وقيعا ورنىنا شىقتى.
وقيعا ورنىنا كەلگەننەن كەيىن، ەر ادام بالىق اۋلاۋ كەزىندە ابايسىزدا بيىك جاعالاۋدان قۇلاپ، ءارتۇرلى ارقا جاراقاتتارىن الىپ، وزدىگىنەن قوزعالا الماعانى انىقتالدى. وقيعا كۋاگەرلەرى ونى جاعاعا شىعارىپ، 112 نومىرىنە قوڭىراۋ شالدى. قۇتقارۋشىلار زارداپ شەككەن ادامدى زەمبىلمەن كوتەرىپ، جارتاستى، تاۋلى جەرلەرمەن جاياۋ جەدەل مەديسينالىق كومەك ەكيپاجىنا جەتكىزدى.
قۇتقارۋ وپەراسياسى اياقتالعاننان كەيىن زارداپ شەككەن ادام الاكول اۋداندىق ورتالىق اۋرۋحاناسىنا جاتقىزىلدى.
جەتىسۋ وبلىسى تجد كۇزگى بالىق اۋلاۋ كەزىندە سۋ ايدىندارىندا قاۋىپسىزدىك ەرەجەلەرىن ساقتاۋ قاجەتتىگىن ەسكە سالادى:
- بالىق اۋلاۋعا بارعاندا اۋا-رايىنىڭ بولجامىن ەسكەرۋ قاجەت: جەلدى اۋا-رايىندا جانە قاراڭعىدا سۋ قويماسىنا بارماڭىز، بۇل ءقاۋىپتى؛
- جازاتايىم وقيعالاردى بولدىرماۋ ءۇشىن جاعادان الىس كەتپەي، بالىق اۋلاعان دۇرىس. سۋ ايدىنىنا بارار الدىندا بالىق اۋلاۋ ورنى، سونداي-اق قايتىپ ورالۋ ۋاقىتى تۋرالى تۋعان-تۋىستارىڭىزعا ەسكەرتىڭىز؛
- بورتتا قۇتقارۋ جانە سيگنال بەرۋ قۇرالدارى بولۋى قاجەت؛
- قايىقتان بالىق اۋلاۋ ەرەجەلەرىنىڭ بىرى-جۇزە ءبىلۋ. بۇل داعدى ءوزىڭىزدى جانە سەرىكتەسىڭىزدى قۇتقارۋعا كومەكتەسەدى.
ەسىڭىزدە بولسىن! ساقتىق شارالارىن ەلەمەۋ جازاتايىم وقيعالارعا، كەيدە قايعىلى جاعدايلارعا اكەلۋى مۇمكىن.