«جايلى مەكتەپ» ۇلتتىق جوباسى اياسىندا الماتى وبلىسىندا 2025 جىلعا دەيىن 54 600 وقۋشىعا ارنالعان 53 مەكتەپ سالۋ جوسپارلانۋدا. بۇل تۋرالى وقۋ-اعارتۋ ءمينيسترىنىڭ وبلىستىق ءماسليحات دەپۋتاتتارىمەن كەزدەسۋىندە بەلگىلى بولدى، دەپ حابارلايدى almaty-akshamy.kz
قازىرگى ۋاقىتتا وڭىردە 1760 ءبىلىم بەرۋ ۇيىمى، ونىڭ ىشىندە 429 مەملەكەتتىك مەكتەپ جۇمىس ىستەيدى. ءۇش اۋىسىمدى مەكتەپتەر ماسەلەسىن شەشۋ ماقساتىندا بيىل 15 570 وقۋشىعا ارنالعان 16 مەكتەپتىڭ قۇرىلىسى باستالدى. بيىل 1 قىركۇيەكتە پايدالانۋعا بەرىلگەن 9 مەكتەپتىڭ 6-ۋى ءبىلىم بەرۋ ينفراقۇرىلىمىن قولداۋ قورى ەسەبىنەن سالىندى. سونىمەن قاتار، ساپار اياسىندا وقۋ-اعارتۋ مينيسترلىگىنىڭ قولداۋىمەن تاعى 5 مەكتەپ سالۋ تۋرالى شەشىم قابىلداندى.
«ءبىزدىڭ مىندەتىمىز — وسكەلەڭ ۇرپاقتى ءقاۋىپسىز جانە جايلى ورتادا جان-جاقتى دامىتۋدى قامتاماسىز ەتۋ. مينيسترلىك ءوز تاراپىنان نەگىزگى ماسەلەلەردى شەشۋدە جەرگىلىكتى اتقارۋشى ورگاندى قولداۋعا دايىن. ءبىلىم بەرۋ ينفراقۇرىلىمىن دامىتۋمەن قاتار وقىتۋ ساپاسىن ارتتىرىپ، تاربيە جۇمىستارىن كۇشەيتۋگە، سونداي-اق ءبىلىم بەرۋ ۇيىمدارىن جوعارى بىلىكتى كادرلارمەن قامتاماسىز ەتۋگە ەرەكشە كوڭىل بولىنەدى»، - دەپ اتاپ ءوتتى عاني بەيسەمبايەۆ.
سونىمەن قاتار، بيىل 102 پاندىك كابينەت ساتىپ الىنىپ، 78 مەكتەپ جاڭعىرتۋدان ءوتتى. جەكە ينۆەستورلاردىڭ قاراجاتى ەسەبىنەن تاعى ەكى مەكتەپتىڭ قۇرىلىسى جۇرگىزىلۋدە.
ەستەرىڭىزگە سالا كەتەيىك، 2023-2024 وقۋ جىلىندا 132 مىڭ وقۋشى ورنىنا ارنالعان 154 جاڭا مەكتەپ ىسكە قوسىلادى. بۇل 12 اپاتتىق جانە 29 ءۇش اۋىسىمدى مەكتەپ ماسەلەسىن شەشۋگە ىقپال ەتەدى.