الماتىنىڭ قالا قۇرىلىسىن باقىلاۋ باسقارماسى قۇرىلىس نورمالارىن ورەسكەل بۇزعان مەردىگەر ۇيىمدارعا قاتىستى قابىلدانىپ جاتقان شارالار تۋرالى حابارلادى.
كەشە "AsiaMaح" ءجشس-ى ءابىش كەكىلباي ۇلى كوشەسىندەگى سىرتقى كارىز جەلىسىن قايتا جاڭارتۋ جۇمىسى بويىنشا، سونداي-اق "سك 7 ستروي" ءجشس-ى كوركەيتۋ جانە ءبىلىم بەرۋ نىساندارىنداعى قۇرىلىس جۇمىسى ءۇشىن قۇرىلىس ليسەنزياسىنان ايىرىلدى.
باسقارما تاعى ءبىرقاتار ۇيىمعا قاتىستى شارالار قابىلدانعانىن حابارلادى. مەملەكەتتىك "№174 مەكتەپ-گيمنازياسى" عيماراتىنا سالىنعان قوسىمشا نىساننىڭ قۇرىلىسى بويىنشا جۇرگىزىلگەن جوسپاردان تىس تەكسەرۋ بارىسىندا جوبالىق شەشىمدەردەن اۋىتقۋ جانە مەملەكەتتىك قۇرىلىس نورمالارىنىڭ ساقتالماۋى انىقتالدى. وسىعان بايلانىستى "قۇرىلىسشى-تبس" ج ش س قۇرىلىس قىزمەتىنىڭ ءبىرقاتار كىشى ساناتى بويىنشا ليسەنزياسىنان ايىرىلدى.
ايتا كەتەيىك، بۇعان دەيىن تەحنيكالىق قاداعالاۋدى تيىسىنشە ورىنداماعان "الاتاۋ ساپا قۇرىلىس" ج ش س اككرەديتاسياسىنان ايىرىلعان بولاتىن. ۇيىم قىزمەتكەرلەرىنىڭ باقىلاۋدى دۇرىس جۇرگىزبەۋى ياسساۋي مەن داستان كوشەلەرىنىڭ قيىلىسىندا اسفالت جابىندىسىنىڭ وپىرىلۋىنا سەبەپ بولعان. سونداي-اق، امانجول كوشەسىندەگى جول جابىندىسىنىڭ شوگۋىنە جول بەرگەن "اركادا KZ" ج ش س اكىمشىلىك جاۋاپكەرشىلىككە تارتىلدى.
اتالعان نىسانداردا جۇمىس جۇرگىزگەن ەكى مەردىگەر ۇيىم دا اكىمشىلىك جاۋاپكەرشىلىككە تارتىلىپ، انىقتالعان بۇزۋشىلىقتاردى جويۋ تۋرالى نۇسقاما بەرىلدى.
قالا قۇرىلىسىن باقىلاۋ باسقارماسىندا اتاپ وتكەندەي، قالا اكىمى دارحان ساتىبالدىنىڭ تاپسىرماسىنا سايكەس قۇرىلىس نىساندارىنا باقىلاۋ كۇشەيتىلدى، جانە انىقتالعان بۇزۋشىلىقتار بويىنشا شارالار زاڭناماعا ساي قابىلدانادى.