قازاقستاندا كيبەربۋللينگ ماسەلەسى قايتا تالقىلانىپ جاتىر. بۇعان ءانشى قايرات نۇرتاستىڭ قىزىنا قارسى جەلى قولدانۋشىلاردىڭ جاپپاي جازعان قورلاۋ پىكىرلەرى سەبەپ بولدى. وقيعاعا بايلانىستى وقۋ-اعارتۋ مينيسترلىگى مەن زاڭگەرلەر پىكىر ءبىلدىردى، - دەپ حابارلايدى aqshamnews.kz 31 ارناعا سىلتەمە جاساپ.
تانىمال تەلەجۇرگىزۋشى دينارا ءساتجاننىڭ ۇندەۋى قازاقستانداعى كيبەربۋللينگ ماسەلەسىن قايتادان كۇن تارتىبىنە شىعاردى. جۋرناليست ءوز كەزەگىندە قايرات نۇرتاستىڭ قىزىنا باعىتتالعان تەرىس پىكىرلەردىڭ كەسىرىنەن كۇيزەلىسكە تۇسكەنىن بىرنەشە رەت كورگەنىن ايتقان.
"بۇل - بارلىق بالاعا قاتىستى ماسەلە. بىزدە زاڭ بار جانە بۇل قىلمىستىق جاۋاپكەرشىلىكتى تۋدىرۋى مۇمكىن. پىكىر جازاتىندار كوبىنە بالالار ەمەس، ەرەسەك ادامدار"، - دەدى ءساتجان.
قازاقستاندا كامەلەتكە تولماعاندارعا قاتىستى ۇجىمدىق قورلاۋعا جانە ينتەرنەت ارقىلى قورلاۋعا قارسى جاۋاپكەرشىلىك بار. ەڭ ماڭىزدىسى - بالانىڭ بۇل تۋرالى ەرەسەكتەرگە قورىقپاي ايتۋى، ءارى ودان كەيىن قۇقىق قورعاۋ ورگاندارى شارا قولدانۋى ءتيىس.
"ەگەر بىزگە مۇنداي اقپارات كەلىپ تۇسسە، ارينە، ءبىز مادەنيەت جانە اقپارات مينيسترلىگىنە جۇگىنەمىز. ولار ءوز كەزەگىندە ۋاكىلەتتى ورگاندارعا - ۇقك-عا جۇگىنەدى. سونىمەن قاتار بىزدە اقپاراتتىق كيبەرباقىلاۋ جۇيەسى بار جانە ءبىز ونى بەلسەندى قولدانامىز"، - دەدى وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى باسقارماسىنىڭ باسشىسى ءلاززات ەسمۇحانوۆا.
ەرەسەكتەردىڭ جاۋاپكەرشىلىگى تۋرالى زاڭگەرلەر دە ەسكەرتتى.
"وسىعان بايلانىستى مورالدىق زياندى وتەۋ تالاپ ەتۋگە بولادى. قورلاۋ ارەكەتىمەن اينالىساتىندار مۇنى ءتۇسىنىپ، ءبىلۋى كەرەك. ەگەر اۋىر سالدارى بولسا، وندا قىلمىستىق جاۋاپكەرشىلىك تە قاراستىرىلۋى مۇمكىن"، - دەدى زاڭگەر سەرگەي ۋتكين.