كەيىنگى جىلدارى ءوڭىر اكىمدەرىنىڭ الەۋمەتتىك جەلىدەگى بەلسەندىلىگى ارتىپ كەلەدى. ءبىرى Instagram مەن TikTok ارقىلى حالىقپەن اشىق ديالوگ ورناتىپ جاتسا، ەندى ءبىرى رەسمي پاراقشالار ارقىلى اتقارىلعان جۇمىستارىن كورسەتىپ جاتىر. الايدا مۇنداي اشىقتىق جۇرت كوڭىلىنەن شىعىپ تا، سىنعا ۇشىراپ تا قالدى. Aqshamnews.kz ءتىلشىسى الەۋمەتتىك جەلىدە كوزگە ءتۇسىپ جۇرگەن اكىمدەردى ءتىزىپ شىقتى.
عابيت سىزدىقبەكوۆ – ەڭ كوپ وقىرمانى بار اكىم
شىمكەنت قالاسىنىڭ اكىمى عابيت ءابدىماجيت ۇلى سىزدىقبەكوۆتىڭ Instagram پاراقشاسىندا 100 مىڭعا جۋىق جازىلۋشىسى بار. ول پاراقشاسىندا قالاداعى ءىس-شارالار، نىسانداردىڭ اشىلۋى، شەشىلگەن ماسەلەلەر تۋرالى ۆيدەولاردى ءجيى جاريالاپ وتىرادى. سونداي-اق، ءتۇرلى پاراقشادا اكىمنىڭ قاتىسۋىمەن تۇسىرىلگەن ۆيدەولار كەڭ تاراپ جاتادى
الايدا بۇل بەلسەندىلىك جۇرتتىڭ بارىنە بىردەي ۇناي بەرمەيدى. بەلگىلى زاڭگەر ايگۇل ورىنبەك ونى: "اكىم ەمەس، بلوگەر بولۋ كەرەك ەدى" دەپ سىنادى. ونىڭ پىكىرىنشە، اكىمنىڭ جۇمىسى شىنايىلىقتان گورى جاساندىلىققا جاقىنىراق كورىنەدى.
"نەگىزى سىزدىقبەكوۆكە ەڭ مىقتى اكىم ەمەس، ەڭ مىقتى بلوگەر دەگەن اتاق بەرۋ كەرەك ەدى. الەۋمەتتىك جەلىگە كىرىپ قالسام شىمكەنتتىڭ اكىمىنەن باسقا اكىم جۇمىس ىستەمەي جاتىر ما دەپ ويلاپ قالدىم. ۆيدەو ءتۇسىرىپ جۇرگەندەر اكىمدەرىڭە ءسال رولگە كىرۋدى دە ۇيرەتسەڭدەرشى، ايتپەسە، ۆيدەولارىڭ تىم جاساندى!"، – دەپ جازدى زاڭگەر.
ايتا كەتەيىك، عابيت ءابدىماجيت ۇلى سىزدىقبەكوۆ 2023 جىلعى 5 قىركۇيەكتە قازاقستان رەسپۋبليكاسىنىڭ پرەزيدەنتىنىڭ جارلىعىمەن رەسمي تۇردە شىمكەنت قالاسىنىڭ اكىمى قىزمەتىنە تاعايىندالعان بولاتىن.
TikTok-تا ترەندتەن تۇسپەيتىن تالعار اكىمى
تالعار قالاسىنىڭ اكىمى ارىستان ءابىلحايىر ۇلى – TikTok جەلىسىنىڭ بەلسەندى قولدانۋشىسى. ونىڭ TikTok-تا 68،6 مىڭ، Instagram-دا 5 مىڭ جازىلۋشىسى بار. ول جەلىدە تۇرعىندار حاتتارىنا ءوزى جاۋاپ بەرىپ، شاعىمدارعا قاتىستى شەشىم قابىلداعان ساتتەرىن جاريالايدى. سونىمەن قاتار ترەندتەردەن دە قالىسپاي، قالجىڭ ارالاس ۆيدەولار دا تۇسىرەدى.
جەرگىلىكتى اكىمنىڭ وسىلايشا حالىقپەن بەيرەسمي فورماتتا بايلانىس ورناتۋى تۇرعىندار اراسىندا سەنىم مەن تانىمالدىق قالىپتاستىرىپ وتىر. ولار اكىمنىڭ حالىق جازعان حابارلامالارعا بىردەن جاۋاپ بەرىپ، كەزدەسىپ، قالاداعى ماسەلەلەردى نازارعا الىپ وتىرعانىنا پىكىرلەر بولىمىندە ءجيى العىسىن جاۋدىرىپ وتىرادى.
ارىستانبەك ءابىلقايىر ۇلى قالا اكىمى بولىپ 2024 جىلعى 15 جەلتوقساندا سايلانعان.
جاڭا اكىمنىڭ جاڭا كونتەنتى
جاڭا لاۋازىمعا سايلانعان الماتى قالاسىنىڭ اكىمى دارحان ساتىبالدى Instagram-دا 60 مىڭعا جۋىق وقىرمان جيناعان. بۇرىن تۇركىستان وبلىسىنىڭ اكىمى، ق ر ءسىم جۇيەسىندە جانە پرەزيدەنت اكىمشىلىگىندە جۇمىس ىستەگەن تاجىريبەلى مەملەكەتتىك قىزمەتكەر، 24 مامىردان باستاپ الماتى قالاسىنىڭ يگىلىگى ءۇشىن قىزمەت ەتىپ جاتىر.
الەۋمەتتىك جەلىدەگى پاراقشاسىن كوبىنە رەسمي سيپاتتا – جۇمىس ساپارلارى، ينفراقۇرىلىم، تۇرعىندارمەن كەزدەسۋلەر تۋرالى پوستتارمەن تولىقتىرىپ وتىرادى.
اۋديتورياسى بار اكىمدەر
اكىمدەر اراسىندا تۇراقتى اۋديتورياسىن جيناپ ۇلگەرگەندەرى دە بار. ماسەلەن، قوستاناي وبلىسىنىڭ اكىمى قۇمار اقساقالوۆتىڭ جازىلۋشىلار سانى – 33،5 مىڭ. ول دا Instagram ارقىلى وڭىردەگى جوبالار مەن كەزدەسۋلەردى تۇراقتى جاريالاپ وتىرادى. ال الماتى قالاسى المالى اۋدانىنىڭ اكىمى ارمان ءشامشيننىڭ پاراقشاسىندا 22،8 مىڭ جازىلۋشىسى بار. ول اۋداندىق دەڭگەيدەگى ماسەلەلەرگە بەلسەنە ارالاسىپ، تۇرعىندارمەن بايلانىس ورناتۋ ءۇشىن Instagram-دى بەلسەندى پايدالانىپ ءجۇر.
بۇدان بولەك اكىمدەر اراسىندا جەكە پاراقشاسىن جۇرگىزبەسە دە الەۋمەتتىك جەلىدە ءجيى توبە كورسەتەتىن اكىمدەر دە بار. مىسالى، ماڭعىستاۋ وبلىسىنىڭ اكىمى نۇرداۋلەت قيلىبايدىڭ جەكە پاراقشاسى جوق. دەگەنمەن ول @mangystau_oblysynyn_akimdigi رەسمي پاراقشاسى ارقىلى ءجيى كورىنىپ تۇرادى. بۇل پاراقشادا اكىمنىڭ ساپارلارى، وڭىرلىك ماسەلەلەر مەن شەشىمدەر، مەملەكەتتىك باعدارلامالار تۋرالى حابارلار جاريالانادى. كوماندالىق جۇرگىزىلەتىن بۇل اككاۋنت – رەسمي ورگاننىڭ مەديابەينەسىن قالىپتاستىرىپ وتىر.