ءماجىلىس دەپۋتاتى اسحات ايماعامبەتوۆ مەديسينا قىزمەتكەرلەرى مەن جەدەل جاردەم جۇرگىزۋشىلەرىنە شابۋىل جاساعاندارعا جازانى كۇشەيتۋ تۋرالى زاڭ جوباسىن تانىستىردى. دەپۋتات ءوز سوزىندە ادىلەتسىزدىك پەن دارىگەرلەردىڭ قورعانسىزدىعىن ناقتى مىسالدارمەن دالەلدەدى، - دەپ حابارلايدى aqshamnews.kz ءتىلشىسى.
دەپۋتات ءسوزىن قوستانايدا بولعان وقيعادان باستادى. وندا تاجىريبەلى ۋرولوگ ناۋقاس تاراپىنان سوققىعا جىعىلىپ، اۋىر جاراقات العان. دارىگەر 4 اي بويى جۇمىسقا شىعا الماعان.
"بۇل مامان اۋىرعان 4 ايدىڭ ىشىندە 960 ادامدى ەمدەر ەدى. ياعني، ءبىر دارىگەردى سوققىعا جىعۋ – ءىس جۇزىندە مىڭ قازاقستاندىقتى ەم-دومسىز قالدىرۋ دەگەن ءسوز"، – دەدى ايماعامبەتوۆ.
سونداي-اق، جەدەل جاردەم قىزمەتكەرلەرىنە جاسالعان شابۋىلدىڭ سالدارى ودان دا اۋىر. جۇرگىزۋشى مەن فەلدشەر جاراقات العان كەزدە، جەدەل جاردەم كولىگى توقتاپ قالادى. بۇل – ينفاركت نەمەسە ينسۋلت العان ناۋقاسقا كومەكتىڭ كەشىگۋى، ياعني ءومىر مەن ءولىم ماسەلەسى.
ەگەر مەن دارىگەر: زاڭ الدىنداعى تەڭسىزدىك
دەپۋتات قولدانىستاعى زاڭناماداعى پارادوكستى اتاپ ءوتتى. ءقازىر ەگەرگە نەمەسە جانۋارلار ينسپەكتورىنا شابۋىل جاساعان ادام 12 جىلعا دەيىن سوتتالۋى مۇمكىن (قك 380-2 بابى). ال ادام ءومىرىن اراشالايتىن رەانيماتولوگقا شابۋىل جاساۋ قاراپايىم بۇزاقىلىق رەتىندە قاراستىرىلىپ، قىلمىسكەر ايىپپۇلمەن قۇتىلىپ كەتەدى.
"ەگەر ءبىز ورمان قورعايتىن ينسپەكتوردى، پروكۋرور مەن سوتتى، قارۋى بار پوليسەيدى قورعاساق، وندا قولىندا ءبىر عانا فونەندوسكوپى بار، ناۋقاستارعا كومەككە باراتىن دارىگەردى قورعاۋعا مىندەتتىمىز"، – دەپ اتاپ ءوتتى دەپۋتات.
جاڭا زاڭ نە ۇسىنادى؟
زاڭ جوباسى اياسىندا قىلمىستىق كودەكسكە جاڭا 380-3-باپ ەنگىزۋ ۇسىنىلىپ جاتىر. ول بويىنشا:
- "مەديسينا قىزمەتكەرى" جانە "جەدەل مەديسينالىق جاردەم جۇرگىزۋشىسى" ارنايى قورعالاتىن سۋبەكتىگە اينالادى.
- ولارعا شابۋىل جاساعانى ءۇشىن جازا ەداۋىر قاتاڭداتىلادى.
اسحات ايماعامبەتوۆ بۇل زاڭ تەك دارىگەرلەر ءۇشىن ەمەس، ەڭ الدىمەن، دەر كەزىندە كومەك كۇتىپ وتىرعان قاراپايىم حالىقتىڭ، بالالار مەن قاريالاردىڭ قۇقىعىن قورعاۋ ءۇشىن قاجەت ەكەنىن جەتكىزدى.