2025 جىلدىڭ سوڭعى ايى قازاقستاندىقتارعا 9 دەمالىس كۇنىن سىيلايدى. سەنبى-جەكسەنبى كۇندەرىنەن بولەك سەيسەنبىدە تاۋەلسىزدىك كۇنىنە وراي تاعى ءبىر كۇن دەمالامىز. ال 30 جانە 31 جەلتوقسان جۇمىس كۇندەرى بولىپ قالا بەرەدى. ەندەشە، قىستىڭ العاشقى ايى قازاقستاندىقتار ءۇشىن تاعى قانداي جاڭالىقتار مەن وزگەرىستەر اكەلمەك؟ اqshamnews.kz ءتىلشىسى جەلتوقساندا كۇتەتىن ماڭىزدى اقپاراتتاردى توپتاستىردى.
ەندى قازاقستاندىقتار اۆتوليزينگ راسىمدەي الادى
1 جەلتوقساننان باستاپ قازاقستان ازاماتتارى ءۇشىن اۆتوليزينگتەر قولجەتىمدى بولادى. بۇعان دەيىن ليزينگتى نەگىزىنەن تەك كومپانيالار پايدالانا الاتىن. ەندى قاراپايىم ازاماتتار دا جەڭىل اۆتوكولىكتى ليزينگكە راسىمدەپ، كەيىن ونى تولىق ساتىپ الۋعا نەمەسە كولىكتى كومپانياعا قايتا وتكىزۋگە مۇمكىندىك الادى.
ءماجىلىس دەپۋتاتى، Respublica پارتياسىنىڭ وكىلى ولجاس قۇسبەكوۆتىڭ ايتۋىنشا، بۇل باستاما ق ر پرەزيدەنتى قاسىم-جومارت توقايەۆتىڭ حالىقتىڭ الەۋمەتتىك جۇكتەمەسىن ازايتۋ جونىندەگى تاپسىرماسى اياسىندا ىسكە اسىرىلىپ وتىر. دەپۋتاتتىڭ سوزىنشە، اۆتوليزينگ باعدارلاماسى بۇرىن جەڭىلدەتىلگەن اۆتونەسيە الا الماعان ازاماتتارعا باعىتتالعان.
"ءبىزدىڭ مىندەت – ليزينگتىڭ جاي عانا باسقا شارتتارمەن بەرىلەتىن اۆتوكرەديتكە اينالىپ كەتپەۋىن قاداعالاۋ. ول شىنىمەن دە حالىققا ىڭعايلى، يكەمدى قارجى قۇرالى بولۋعا ءتيىس"، – دەدى قۇسبەكوۆ.
سۋرەت: قايرات قونىسپايەۆ
جاڭا اۋە رەيستەرى مەن لوۋكوستەرلەر پايدا بولادى
جەلتوقساننان باستاپ قازاقستاننىڭ اۋە نارىعىندا تايلاندتىڭ جاڭا لوۋكوستەرى – Thai AirAsia X جۇمىسىن باستايدى. اۋە كومپانياسى بانگكوك – الماتى باعىتى بويىنشا تىكەلەي تۇراقتى رەيستەردى اپتاسىنا ءتورت رەت ورىندايدى: دۇيسەنبى، سارسەنبى، بەيسەنبى جانە جەكسەنبى كۇندەرى.
ازاماتتىق اۆياسيا كوميتەتىنىڭ مالىمەتىنشە، ۇشۋ گەوگرافياسىن كەڭەيتۋ جانە حالىقارالىق رەيستەر سانىن ارتتىرۋ باعىتىنداعى جۇمىس جالعاسىپ جاتىر.
سونىمەن قاتار، 18 جەلتوقساننان باستاپ بەلارۋستىڭ «بەلاۆيا» اۋە كومپانياسى مينسك – الماتى باعىتىنداعى رەيستەرىن قايتا جاڭعىرتادى. بۇل تۋرالى كومپانيانىڭ باس ديرەكتورى يگور چەرگينەس حابارلادى. بۇعان دەيىن بۇل رەيس ورىندالعان، سۇرانىستا ءجيى بولعان، ءبىراق كەيىنىرەك توقتاتىلعان ەدى.
الماتىدان تاشكەنتكە Talgo پويىزىمەن بارۋعا بولادى
14 جەلتوقساننان باستاپ «جولاۋشىلار تاسىمالى» اق الماتى – تاشكەنت باعىتى بويىنشا كۇندەلىكتى جۇرەتىن Talgo پويىزىن ىسكە قوسادى. مارشرۋتتا جايلىلىق دەڭگەيى جوعارى Talgo قۇرامدارى پايدالانىلماق. كۇن سايىن ءجۇرۋ كەستەسى جولاۋشىلارعا ساپارلارىن الدىن الا ىڭعايلى جوسپارلاۋعا مۇمكىندىك بەرەدى.
جولدا ءجۇرۋ ۋاقىتى – 17 ساعات 38 مينۋت.
شامامەن بيلەت باعالارى:
-
وتىراتىن ۆاگوندار – 10 167 تەڭگەدەن،
-
كۋپە – 20 711 تەڭگە،
-
ليۋكس – 30 772 تەڭگە.
بيلەتتەردى bilet.railways.kz رەسمي سايتىنان نەمەسە تەمىرجول ۆوكزالدارىنىڭ كاسسالارىنان ساتىپ الۋعا بولادى.
سۋرەت: AtyrauPress
وقۋشىلار قىسقى كانيكۋلعا شىعادى
قازاقستانداعى 1–11 سىنىپ وقۋشىلارى قىسقى دەمالىسقا 29 جەلتوقساننان 7 قاڭتارعا دەيىن شىعادى. 8 قاڭتاردا ولار ءۇشىنشى توقسانداعى ساباقتارىنا قايتا ورالادى.
قوسىمشا دەمالىس ءبىرىنشى سىنىپ وقۋشىلارىنا قاراستىرىلعان: ولار ءۇشىن 9–15 اقپان ارالىعىندا قوسىمشا تاعى ءبىر اپتا قىسقى كانيكۋل بولادى.
ال كوكتەمدە بارلىق وقۋشى 19–29 ناۋرىز ارالىعىندا دەمالادى.
سۋرەت: الماتى اكىمدىگى
الماتىلىق "قايرات" "وليمپياكوسقا" قارسى وينايدى
سەيسەنبى، 9 جەلتوقساندا الماتىلىق "قايرات" كلۋبى ۋەفا چەمپيوندار ليگاسىنىڭ جالپى كەزەڭىندەگى ءوز الاڭىنداعى ءماچىن گرەكتىڭ "وليمپياكوس" كومانداسىنا قارسى وتكىزەدى.
الايدا اۋا رايىنىڭ كۇردەلى جاعدايىنا بايلانىستى بۇل كەزدەسۋ، سونداي-اق بەلگيالىق "بريۋگگە" كلۋبىنا قارسى ءماچى دە الماتىدا ەمەس، "استانا ارەنادا" وتەدى. مۇنداي شەشىم ۋەفا-مەن بىرلەسىپ قابىلدانعان.
ويىننىڭ باستالۋى – استانا ۋاقىتىمەن كەشكى 20:30 دەپ بەلگىلەنىپ وتىر.
سۋرەت: قايرات قونىسپايەۆ
ەلەنا رىباكينا ءۇندىستانداعى تۋرنيرگە قاتىسادى
قازاقستاندىق تەننيسشى ەلەنا رىباكينا ءۇندىستاننىڭ بانگالور قالاسىندا وتەتىن World Tennis League كورمە تۋرنيرىنە قاتىسادى. جارىس 17–20 جەلتوقسان ارالىعىندا وتەدى.
ايەلدەر اراسىندا يسپانيادان پاۋلا بادوسا، ۋكراينادان مارتا كوستيۋك، پولشا تەننيسشىسى ماگدا لينەتت جانە ءبىرقاتار ءۇندى سپورتشىلارىنىڭ دا قاتىساتىنى حابارلانعان.
سۋرەت: Matthew Stockman/Getty Images for WTA
جاڭا كومپانيالارعا ارنالعان ەلەكتر ەنەرگياسى تاريفتەرى كۇشىنە ەنەدى
1 جەلتوقساننان باستاپ قازاقستاندا ەلەكتر ەنەرگياسىنا ارنالعان جاڭارتىلعان شەكتى تاريفتەر كۇشىنە ەنەدى. ەنەرگەتيكا مينيسترلىگى قولدانىستاعى بۇيرىققا وزگەرىستەر ەنگىزىپ، وندىرۋشىلەر تىزىمىنە ءۇش جاڭا كومپانيانى قوستى:
-
«Sintra Energy» ج ش س،
-
«KAZ GREEN ENERGY» ج ش س،
-
«Aktobe Energy Gaz» ج ش س.
بۇل ستانسيالار ءۇشىن الداعى جىلعا جوسپارلانعان ەلەكتر ەنەرگياسىن ءوندىرۋ شىعىندارى نەگىزىندە شەكتى تاريفتەر بەلگىلەنەدى.
ۆەدومستۆونىڭ مالىمەتىنشە، نارىققا جاڭا كومپانيانىڭ كەلۋى ءبىرتۇتاس ساتىپ الۋشى ءۇشىن ەلەكتر ەنەرگياسىنىڭ ورتاشا باعاسىنا اسەر ەتپەيدى. سەبەبى بۇل كومپانيالاردىڭ گەنەراسيا كولەمى سالىستىرمالى تۇردە از بولادى، سوندىقتان جالپى ساتىپ الۋ قۇنىنا ايتارلىقتاي ىقپال ەتپەيدى.
سۋرەت: depositphotos.com
دوللار جەلتوقساندا قايتا قىمباتتاۋى مۇمكىن
كوپتەگەن قارجى ساراپشىلارى جىلدىڭ اياعىنا قاراي، جاڭا جىل قارساڭىندا، تەڭگە ءسال السىرەپ، دوللاردىڭ پوزيسياسى قايتا كۇشەيۋى مۇمكىن دەگەن پىكىردە ەكەندەرىن جەتكىزدى.
ماسەلەن، قارجىگەر جانە بۇرىنعى بانكير سۇلتان ەلەمەسوۆ جىلدىڭ اياعىنا تامان دوللار باعامى 540-قا دەيىن كوتەرىلەدى دەپ بولجادى:
"قاراشا ايىندا تەڭگەنىڭ نىعايۋى جالپى كۇتكەن نارسە ەدى. كوپتەگەن اناليتيكتەر مۇنى بولجاعان ەدى. ال جىل اياعىندا نە بولادى؟ مىسالى، Halyk Finance، قاتەلەسپەسەم جىلدىڭ اياعىندا دوللارعا 550–560 تەڭگە دەپ بولجام ايتىپ ەدى. ءوز باسىم ونداي قاتتى پەسسيميست ەمەسپىن. مەنىڭ ويىمشا، جىل اياعىنا 535–540 تەڭگە ارالىعىنداعى باعامدى كورەمىز"، – دەيدى ساراپشى.
ياعني ساراپشىلار تەڭگە ءۇشىن اسا كۇردەلى سەناريي بولجاماسا دا، دوللاردىڭ بەلگىلى ءبىر دەڭگەيدە قىمباتتاۋ ىقتيمالدىعىن جوققا شىعارمايدى.
سۋرەت: rbc.ru