ايماعامبەتوۆ اعىلشىن ءتىلىن مەكتەپتە اپتاسىنا ءۇش ەمەس، بەس رەت وقىتۋدى ۇسىندى، دەپ حابارلايدى aqshamnews.kz
ءماجىلىس دەپۋتاتى، بۇرىنعى ءبىلىم ءمينيسترى اسحات ايماعامبەتوۆ ۇكىمەتكە جولداعان دەپۋتاتتىق ساۋالىندا قازىرگى تالاپتاردى قايتا قاراپ، ادىلەتتى جول ۇسىنۋدى سۇرادى.
قولدانىستاعى ەرەجە بويىنشا، تالاپكەرلەر اعىلشىن تىلىنەن مىندەتتى ەمتيحان تاپسىرۋى ءتيىس. بۇل تالاپ وقىتۋ ءتىلى قازاق نەمەسە ورىس تىلىندە جۇرەتىن ماماندىقتارعا دا بىردەي قولدانىلادى. ماسەلە — ءتىلدى بىلمەگەنى ءۇشىن قابىلەتتى جاستاردىڭ عىلىمنان تىس قالۋىندا.
«قازاق ادەبيەتى مەن ونەرىن زەرتتەگىسى كەلەتىن جاستار اعىلشىن ەمتيحانىنان وتە الماعانى ءۇشىن ماگيستراتۋرا مەن دوكتورانتۋراعا تۇسە الماي ءجۇر»، – دەيدى دەپۋتات.
ايماعامبەتوۆ بۇل تالاپتى كەزىندە مينيستر رەتىندە ءوزى بەكىتكەنىن مويىندايدى. ءبىراق ۋاقىت وزگەردى. ونىڭ ايتۋىنشا، ChatGPT مەن Gemini سەكىلدى جاساندى ينتەللەكت قۇرالدارى اعىلشىن تىلىندەگى اقپاراتتى اۋدارۋدا ەلەۋلى ءرول اتقارا باستادى. سوندىقتان عىلىمعا قولجەتىمدىلىكتى اعىلشىن ەمتيحانىمەن شەكتەۋ – بۇگىنگى كۇننىڭ تالابىنا ساي كەلمەيدى.
ايماعامبەتوۆتىڭ ۇسىنىستارى تەك سىن ەمەس، ناقتى رەفورمالىق قادامداردى دا قامتيدى: مەكتەپتەردە اعىلشىن ءتىلىن وقىتۋدى كۇشەيتۋ، وقۋ بارىسىندا اعىلشىن ءتىلىن تەرەڭدەتىپ ەنگىزۋ، تالاپتاردى سالالىق سارالاۋعا كوشۋ بولىپ وتىر.
بىرىنشىدەن، اعىلشىن ءتىلىن ەرتە – مەكتەپتەن باستاپ ساپالى تۇردە وقىتۋدى ءارى قاراي كۇشەيتۋ قاجەت. كەزىندە پرەزيدەنتتىڭ تاپسىرماسىنا سايكەس 3-4 سىنىپتار مەن 10-11-سىنىپتاردا اعىلشىن ءتىلى ساعاتىن اپتاسىنا 3 ساباقتان 5 ساباققا دەيىن كوبەيتۋدى قولعا العانبىز. ءبىراق بۇل باستاما تولىق ىسكە اسپادى. وسى باعىتتى ناقتى ىسكە اسىرۋىمىز كەرەك. ەكىنشىدەن، وقىتۋ ءتىلى قازاق نەمەسە ورىس تىلىندە جۇرگىزىلەتىن باعىتتاردا اعىلشىن تىلىنەن ەمتيحاندى ءتۇسۋ كەزىندە ەمەس، وقۋ اياقتالعان سوڭ تاپسىرۋدى قاراستىرعان ءجون. ال سول كەزەڭگە دەيىن اعىلشىن ءتىلىن باكالارۆريات، ماگيستراتۋرا مەن دوكتورانتۋرانىڭ وقۋ باعدارلاماسىنا كىرگىزىپ، تەرەڭدەتىپ وقىتقان دۇرىس. سوندا ناقتى ناتيجە بولادى. ۇشىنشىدەن، اعىلشىن تىلىندە وقىتاتىن نەمەسە قوسديپلومدى باعدارلامالار، مەن فيليالدار ءۇشىن بۇل تالاپتى كەرىسىنشە كۇشەيتكەن ءجون. ياعني ءار باعىتقا قاراي سارالاۋ قاجەت. تورتىنشىدەن، Scopus پەن Web of Science بازالارىندا ماقالا جاريالاۋ تالابىن دا ماماندىقتىڭ ەرەكشەلىگىنە قاراي قاراستىرعان ءجون، – دەيدى ول.