كوپشىلىك جۇرت اتوم رەاكتورلارىن ءقاۋىپتى دەپ ويلايدى. ءىس جۇزىندە اتوم ەلەكتر ستانسيالارى، اسىرەسە، قازاقستانعا ۇسىنىلىپ وتىرعان سۋ-سۋلى ەنەرگەتيكالىق رەاكتورلار الەمدەگى ەڭ ءقاۋىپسىز رەاكتورلار بولىپ ەسەپتەلەدى. قازىرگى تاڭدا الەمدە 415 رەاكتور جۇمىس ىستەپ تۇرسا، سونىڭ 250-گە جۋىعى وسى سۋ-سۋلى رەاكتورلار. ونىڭ ۇستىنە قازىرگى 3+ ۇرپاقتاعى اەس-تەردە اكتيۆتى جانە ءپاسسيۆتى ءوزارا ءبىرىن-بىرى قايتالايتىن قاۋىپسىزدىك جۇيەلەرى بار. عىلىمي ەسەپتەر بويىنشا بەلسەندى ايماقتاردا اەس-تەردە قانداي دا ءبىر اۋىر اپاتتىڭ بولۋى ىقتيمالدىعى وتە تومەن. ايتالىق، 10 ميلليون جىلدا ءبىر رەت دەپ ەسەپتەلەدى، بۇل وتە تومەن ىقتيمالدىلىق.
سونىمەن قاتار، قاراپايىم ازاماتتار اراسىندا اەس بولعان جەردە ودان كەمىندە 50 شاقىرىم اۋماقتا ءومىر سۇرۋگە بولمايدى، رادياسيا تارايدى دەگەن قاتە تۇسىنىك بار. شىن مانىندە، قازىرگى زامانعى 3+ ۇرپاق اتوم رەاكتورلارىنداعى سانيتارلىق قورعاۋ ايماعى تەك اەس الاڭىمەن عانا شەكتەلەدى. ياعني، اەس اۋماعىنان 3 شاقىرىمنان تىسقارى اۋماق رادياسيالىق ءقاۋىپتى ايماق بولىپ سانالمايدى.
ەگەر الداعى رەفەرەندۋم وڭ شەشىمىن تاۋىپ جاتسا، اەس سالۋ ەلىمىزگە ۇلكەن مۋلتيپليكاتيۆتى اسەر بەرەدى. بۇل دەگەنىمىز ەلىمىزگە جاڭا، بۇرىن بولماعان اۋقىمدى يادرولىق تەحنولوگيانىڭ كەلۋى. بۇل – قازاقستاندى الەمدەگى يادرولىق تەحنولوگياسى بار 32 ەلدىڭ قاتارىنا قوسپاق. سونىمەن قاتار، اەس-تىڭ 10–12 جىلدىق قۇرىلىس بارىسىندا 8000–10000 ادامعا دەيىن جۇمىسپەن قامتي الادى، ءارى بۇكىل جوبا بارىسىندا 2-3 ملرد اقش دوللارى سالىق رەتىندە ەلىمىزگە تۇسەدى. جوبا اياقتالعاننان كەيىن دە 2 مىڭعا جۋىق تۇراقتى جۇمىس ورنى پايدا بولادى.
اەس ەلدىڭ ينۆەستيسيالىق تارتىمدىلىعىنا ۇلكەن اسەرىن بەرەدى. كوپكە ءمالىم، ءىرى ينۆەستورلاردىڭ باستى تالاپتارى قاشاندا تۇراقتى ەنەرگيا كوزى. اەس بۇل تالاپتىڭ سەنىمدى كەپىلى بولا الادى جانە ەكولوگيالىق تۇرعىدا بارلىق تالاپتاردى قاناعاتتاندىرادى.
ارينە، ەلىمىزدىڭ ەنەرگەتيكالىق تاۋەلسىزدىگى تۇرعىسىنان دا كوپتەگەن تيىمدىلىكتەرىن ايتۋعا بولادى. اەس ەڭ الدىمەن تۇراقتى ەنەرگيا كوزى بولعاندىقتان، بۇل ءوندىرىس پەن تۇرمىس ءۇشىن ماڭىزدى. ءقازىر قازاقستان 2،6 ملرد كۆت/ساعات ەلەكتر ەنەرگياسىن كورشى ەلدەردەن يمپورتتاپ وتىر. ەلەكتر ەنەرگياسىنا دەگەن تاپشىلىق حالىق سانىنىڭ، ەكونوميكا مەن ءوندىرىس ورىندارىنىڭ ۇلعايۋىنا بايلانىستى جىل سايىن وسە بەرەتىن بولادى. كومىرمەن جۇمىس ىستەپ تۇرعان ستانسيالارىمىزدىڭ 70 پايىزى توزعان. ەگەر ءبىز تۇراقتى گەنەراسيا كوزىن جاساماساق، بۇل ءتۇبى ەكونوميكامىزعا كەرى اسەرىن تيگىزەدى.