بۇگىنگى تاڭدا دۇنيە جۇزىندەگى جانە كورشىلەس ەلدەردەگى گەوساياسي جاعدايدىڭ كۇردەلەنۋى كەزىندە پرەزيدەنت قاسىم-جومارت توقايەۆتىڭ كەزەكتى جولداۋى ۇلكەن وپتيميستىك ماڭىزعا يە. نەگىزىنەن، پرەزيدەنت حالىققا بۇرىنعى جولداۋدا ايتىلعان ماسەلەلەردىڭ شەشىلگەنى نەمەسە ءالى دە شەشىلمەگەنى تۋرالى ايتىپ ءوتتى. ءبىزدىڭ بايقاعانىمىز، پرەزيدەنت ءاربىر جولداۋىن ەل بولاشاعىن ەلەڭ ەتكىزەتىن وتكىر ماسەلەلەر مەن ۇلت بولاشاعىنا ارنالعان جوسپارلار نەگىزىندە قۇراستىرىپ وتىر.
دەگەنمەن، ەكونوميكالىق، الەۋمەتتىك، ءبىلىم بەرۋ، تاربيە، عىلىم، ەكولوگيا، دەموگرافيالىق جانە ونەركاسىپ سياقتى ماسەلەلەردى شەشۋ باعىتتارى انىق. اتاپ ايتقاندا، الدىمەن اقشا-نەسيە ساياساتى مەن فيسكالدى ساياسات اراسىنداعى ۇيلەسىمسىزدىكتى جويۋ قاجەتتىگى كورسەتىلدى. بۇل ەلىمىزدە كوپتەگەن ازاماتتاردىڭ بانكتەرگە قارىزعا باتىپ، قارجىلىق پروبلەمالارعا تاپ بولىپ وتىرعانىن اڭعارتادى. وسىنى مەملەكەت باسشىسى ەرەكشە اتاپ ءوتتى. سوندىقتان «قارىزسىز قوعام» جوباسى اياسىندا حالىقتى بىلىمگە، جاستاردى ادال ەڭبەك ەتۋگە شاقىردى.
ءقازىر بۇكىل الەمدە سيفرلىق تەحنولوگيالار مەن جاساندى ينتەللەكتكە قاتىستى باسەكە قىزىپ تۇر. بارلىق جەردە رەسۋرس ءۇشىن تالاس جۇرۋدە. كليماتتىڭ وزگەرۋى، ازىق-تۇلىك قاۋىپسىزدىگى جانە دەموگرافيالىق تۇرعىدان ورنىقتى دامۋ ەڭ وزەكتى ماسەلەلەرگە اينالعان. ءبىر سوزبەن ايتقاندا، ادامزات تاريحىندا بۇرىن-سوڭدى بولماعان سىن-قاتەرلەر مەن تۇبەگەيلى وزگەرىستەر ءداۋىرى باستالدى. سونىمەن قاتار، جولداۋدا ءسوز بولعانداي، اتوم ەلەكتر ستانسياسىن سالۋ ماسەلەسى الەۋمەتتىك جەلىلەردە كەڭىنەن تالقىلانۋدا. پرەزيدەنت قوعامدا ۇلكەن رەزونانس تۋدىرىپ وتىرعان زورلىق-زومبىلىق، الەۋمەتتىك قيىندىقتار، مەديسينا سالاسىنداعى قىزمەت ساپاسىنىڭ تومەندىگى، ءبىلىم بەرۋ مەن عىلىمداعى سايكەسسىزدىكتەر سياقتى ماسەلەلەرگە جان-جاقتى توقتالىپ ءوتتى. بيىل قازان ايىندا وتەتىن اتوم ەلەكتر ستانسياسىن سالۋعا قاتىستى جالپىۇلتتىق رەفەرەندۋم دا وتە وزەكتى ماسەلە بولىپ وتىر.