مەملەكەت باسشىسىنىڭ تاپسىرماسىنا سايكەس، «ادال ازامات» ءبىرتۇتاس تاربيە باعدارلاماسى بيىلعى وقۋ جىلىنان باستاپ مەنشىك تۇرىنە قاراماستان، بارلىق ءبىلىم بەرۋ ۇيىمدارىنا ەنگىزىلدى، - دەپ حابارلايدى Aqshamnews.kz.
وقۋ-اعارتۋ مينيسترلىگىنىڭ مالىمەتىنشە، قازىرگى تاڭدا ەلىمىزدەگى مەملەكەتتىك مەكتەپتەرمەن قاتار، 700-دەن استام جەكەمەنشىك مەكتەپتە دە تاربيە جۇمىسى تولىقتاي وسى باعدارلاما اياسىندا ىسكە اسىرىلۋدا. باعدارلاما وسكەلەڭ ۇرپاققا جالپىادامزاتتىق قۇندىلىقتاردى سىڭىرە وتىرىپ، ءبىلىمدى، ەڭبەكقور، باسەكەگە قابىلەتتى، ادال ازامات قالىپتاستىرۋعا باعىتتالعان.
قازاقستاندىق ءبىلىم بەرۋ ۇيىمدارىندا تاربيەنىڭ ءبىرتۇتاس ەكوجۇيەسىن قالىپتاستىرۋ ماقساتىندا مينيسترلىكتىڭ ۇيىمداستىرۋىمەن پەداگوگتەر ءۇشىن سەمينار-ترەنيگتەر ۇيىمداستىرىلۋدا. «ادال ازامات» باستاماسى بويىنشا 23 مىڭنان استام پەداگوگ كاسىبي دايىندىقتان ءوتتى. بۇل ءىس-شارا مەكتەپتەردى ادىستەمەلىك قولداۋ، جوبانىڭ ءمانىن ءتۇسىندىرۋ جانە وڭىرلەردە تاجىريبە الماسۋدى قامتاماسىز ەتۋگە باعىتتالعان.
سونىمەن قاتار، پەداگوگتەر پراكتيكالىق كەيس-سەسسيالار مەن ترەنينگتەر ارقىلى ناقتى ءىس-قيمىل الگوريتمدەرىن جاساپ، جۇمىس جوسپارلارىن ازىرلەدى. بۇل تاجىريبە ۇستازداردىڭ تەك تەوريامەن شەكتەلمەي، ناقتى قادامدار ارقىلى تاربيە جۇمىسىن ءتيىمدى ۇيىمداستىرۋدى مەڭگەرۋىنە باعىتتالدى.