وڭتۇستىك كورەيا، جاپونيا، سينگاپۋردان شەتەلدىك تاعىلىمدامادان ءوتىپ كەلگەن الماتى قالاسىنىڭ 7 ءجاتتىقتىرۋشى-مۇعالىمى فيزيكا ءپانى مۇعالىمدەرىنە ءدارىس ءوتىپ، تاجىريبەسىن ءبولىستى.
قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ جوسپارى نەگىزىندەگى «ينتەگراسيالانعان STEM-ساباقتاردى جوبالاۋ داعدىلارىن قالىپتاستىرۋ ارقىلى وقۋشىلاردىڭ سىندارلى ويلاۋىن ارتتىرۋ» تاقىرىبىنداعى سەمينار جاراتىلىستانۋ-عىلىمي باعىتتاعى پاندەر ءبولىمىنىڭ ادىسكەرى ءنازيما جاقىپوۆانىڭ جەتەكشىلىگىمەن №178 مامانداندىرىلعان ليسەي بازاسىندا ءوتتى.
فيزيكا ءپانى مۇعالىمدەرىنىڭ كاسىبي قۇزىرەتتىلىگىن ارتتىرۋ، شەتەلدىك تاجىريبەدە جيناقتالعان يننوۆاسيالىق STEM-تاسىلدەردى وقۋ ۇدەرىسىنە ەنگىزۋ جانە تاجىريبەلىك تاپسىرمالار ارقىلى ارىپتەستەرمەن ءبولىسۋدى ماقسات ەتكەن سەميناردا وقۋشىلاردىڭ سىندارلى ويلاۋ داعدىلارىن قالىپتاستىرۋ ءۇشىن ينتەگراسيالانعان STEM-ساباقتاردى جوبالاۋ تاسىلدەرىنىڭ وزەكتىلىگى ايتىلدى.
تاجىريبەلىك سەمينار الاڭىندا ينتەراكتيۆتى جانە ەكسپەريمەنتتىك تاپسىرمالار تىزبەگى ۇيىمداستىرىلدى. ونىڭ بارىسىندا STEM تاجىريبەسى: «ۇزىندىعى ءارتۇرلى شىرىن تۇتىكتەرىن پايدالانا وتىرىپ، قۇلاق تاياقشالارىنىڭ ۇشۋ قاشىقتىعىن زەرتتەۋ» بارىسى تۋرالى ايتىلدى. بۇل تاجىريبە ينجەنەرلىك ويلاۋ مەن جوبالاۋ، سىناۋ جانە وڭتايلاندىرۋ داعدىلارىن قالىپتاستىرۋعا باعىتتالدى. سونىمەن قاتار «يىنتىرەكتى پايدالانۋ ارقىلى تەپە-تەڭدىك جاعدايىن زەرتتەۋ» تاجىريبەسى فيزيكالىق تەپە-تەڭدىك جانە جوبالىق ويلاۋدى دامىتۋعا نەگىزدەلگەن بولسا، «قوزعالمايتىن بلوكتاردى پايدالانۋ ارقىلى وقۋ ساۋاتتىلىعىن تەكسەرۋ» - بۇل جۇمىس وقۋشىلاردىڭ وقۋ جانە زەرتتەۋ داعدىلارىن ءپانارالىق ينتەگراسيا ارقىلى جەتىلدىرۋگە باعىتتالدى.
ورتالىق ادىسكەرى نازيما جاقىپوۆا كاسكادتى وقىتۋدىڭ تيىمدىلىگىنە توقتالدى. مۇنداي شارالار پەداگوگتاردىڭ كاسىبي قاۋىمداستىعىن نىعايتىپ، تەوريا مەن تاجىريبەنى ۇشتاستىرۋعا مۇمكىندىك بەرەدى. «ءبىلىم بەرۋ ۇدەرىسىندەگى كۇندىلىكتى وزگەرىستەر مۇعالىمدەردىڭ جىگەرىن جانىپ، ولاردى جاڭاشىلدىققا، ءبىلىم كەمەسىنىڭ جەلكەنىندە قالىقتاۋعا باعىتتاۋ مەنىڭ ماقساتىم. قالا مەكتەپ مۇعالىمدەرىنىڭ بولاشاق جاس ۇرپاقتى تاربيەلەۋدەگى جانە ءبىلىم ساپاسىن ارتتىرۋداعى جۇيەلى ىلگەرى دامۋى، حالىقارالىق وزىق تاجيىربەگە نەگىزدەپ بۇگىنگى تاڭدا ءتۇرلى سەمينار-ترەنينگتەر وتكىزىپ وتىرمىز. فيزيكا ءپانىنىڭ مۇعاىلمدەرىنە ارنالعان بۇل پراكتيكا ساباقتارى ءوز سىنىپتارىندا قولدانۋعا جانە وقۋشىلاردىڭ وقۋ جانە فۋنكسيونالدى ساۋاتتىلىقتارىن اشۋعا ارنالعان» دەدى ادىسكەر.
№80 جالپى ءبىلىم بەرەتىن فيزيكا ءپانىنىڭ ءمۇعالىمى، جاس مامان وركەن ادايەۆ سەميناردان العان اسەرىمەن ءبولىسىپ، STEM ءبىلىم باعدارلاماسىن مەكتەپ وقۋشىلارىنا ۇيرەتۋ، تاجىريبە جۇزىندە قولدانۋ، سونىمەن بىرگە وقۋشىلارعا فيزيكا، ماتەماتيكا پاندەرى ارقىلى قاجەتتى اقپاراتتى بەرۋدىڭ ماڭىزىنا توقتالدى.
№57 جالپى ءبىلىم بەرەتىن مەكتەپتىڭ فيزيكا ءپانىنىڭ ءمۇعالىمى، ترەنەر جاسۇلان جۇماحان وڭتۇستىك كورەيا، جاپونيا، سينگاپۋر تاجىريبەسىنىڭ قالا مەكتەپتەرى ءۇشىن قاجەتتىلىگىن اتاپ ءوتتى. وسى ورايدا STEM، STEAM، STREAM ءبىلىم بەرۋ باعدارلامالارىمەن تانىستىرىپ وتكەن ترەنەر وقۋ جانە جازۋ ساۋاتتىلىعىنا ارنالعان STREAMء-دى نەگىزە الا وتىرىپ جاھاندىق ماڭىزدىلىققا يە بولىپ تۇرعان جاساندى ينتەلەكتكە نەگىزدەپ وقىتۋدىڭ ەرەكشەلىكتەرى تۋرالى ايتىپ بەردى.
ترەنەرلەر سەمينار بارىسىندا وقۋشىلاردىڭ سىندارلى ويلاۋ داعدىلارىن قالىپتاستىرۋعا ارنالعان تاپسىرمالاردى ازىرلەپ، توپتىق جۇمىستار مەن پراكتيكالىق تالداۋلار جۇرگىزدى.
قاتىسۋشىلار حالىقارالىق تاسىلدەردى ەلىمىزدىڭ وقۋ جۇيەسىنە بەيىمدەۋ جولدارىن قاراستىردى. ۇيىمداستىرۋشىلار اتاپ وتكەندەي، سەمينار مۇعالىمدەردىڭ كاسىبي دامۋىنا، جاڭا ادىستەردى مەڭگەرۋىنە جانە وقۋشىلاردىڭ ويلاۋ داعدىلارىن دامىتۋعا باعىتتالعان ءتيىمدى پلاتفورما رەتىندە فيزيكا ءپانى مۇعالىمدەرىنىڭ شىعارماشىلىق جانە يننوۆاسيالىق ىزدەنىستەرىنىڭ نىعايۋىنا ىقپال ەتەدى.