بۇگىن QS World University Rankings by Subject 2024 بەدەلدى حالىقارالىق رەيتينگىنىڭ ناتيجەلەرى جاريالاندى، ونىڭ ناتيجەلەرى بويىنشا اباي اتىنداعى قازۇپۋ 7 ءپان بويىنشا الەمنىڭ ۇزدىك ۋنيۆەرسيتەتتەرىنىڭ قاتارىنا ەندى، دەپ حابارلايدى Almaty-akshamy.kz.
وسىلايشا، ۋنيۆەرسيتەت جەتىستىكتەر ەنشىسىنە تاعى 4 ءبىلىم بەرۋ باعدارلاماسى قوسىلدى، ارينە، بۇل - جوعارى ءبىلىمنىڭ الەمدىك ارەناسىنداعى ۇلكەن جەتىستىك جانە مويىندالۋ بولىپ تابىلادى.
بۇكىل الەم بويىنشا پاندىك رەيتينگتەردىڭ تانىمالدىلىعىنىڭ وسۋىنە ماماندانۋ، ساپانى قامتاماسىز ەتۋگە سۇرانىس، جاھاندىق باسەكەلەستىكتىڭ ارتۋى، جۇمىسقا ورنالاسۋ مۇمكىندىكتەرى، اشىقتىق پەن قولجەتىمدىلىك سىندى سەبەپتەرىن اتاپ وتە الامىز.
بيىلعى رەيتينگتە الەمنىڭ 1500-دەن استام ۋنيۆەرسيتەتى مەن 96 جەرىنەن كەلگەن ستۋدەنتتەردىڭ بەس كەڭ پاندىك ساناتىنا توپتاستىرىلعان 16 400-دەن استام ۋنيۆەرسيتەت باعدارلامالارىنىڭ تيىمدىلىگىنە تاۋەلسىز سالىستىرمالى تالداۋ قامتاماسىز ەتىلدى.
قازاقستاننىڭ 119 جوعارى وقۋ ورنىنان پاندىك رەيتينگكە 8 جوعارى وقۋ ورنى قاتىسىپ، 57 باعدارلاماعا تالداۋ جاسالدى، ولاردىڭ 17ء-سى ءوز ورنىن جاقسارتسا، 7ء-ۋى تومەندەدى، 13ء-ى ءوز ورنىن ساقتاپ قالىپ، ال 20-سى رەيتينگكە العاش رەت ەندى.
اباي اتىنداعى قازۇپۋ ءداستۇرلى تۇردە ەڭ جاقسى ناتيجەنى «الەۋمەتتىك عىلىمدار جانە مەنەدجمەنت» (Social sciences & Management) ساناتىندا «ءبىلىم جانە وقىتۋ» (Education&Training) پاندىك سالاسى بويىنشا كورسەتتى - 54 ورىن (قازاقستان بويىنشا 1 ورىن)، بۇل وتكەن جىلعى ناتيجەدەن 22 ۇپايعا جوعارى! ال بۇل قازاقستانداعى پەداگوگيكالىق ءبىلىم بەرۋ كوشباسشىسىنىڭ ميسسياسى ورىندالاتىندىعىن تاعى ءبىر دالەلدەدى. بۇل سانات بويىنشا العاش رەت «قۇقىقتانۋ» ءپانى قاتارعا ەندى - 301-350 ورىن (قازاقستان بويىنشا 3 ورىن).
5 رەيتينگ ساناتىنىڭ ىشىندە ۋنيۆەرسيتەت وتكەن جىلعىداي تاعى دا «ونەر جانە گۋمانيتارلىق عىلىمدار» (Arts & Humanities) ساناتىندا بەلگىلەندى - الەمدىك رەيتينگتە 351ء-شى ورىن. اتالعان ساناتتا ۇزدىك 100-گە ەنگەن «اعىلشىن ءتىلى جانە ادەبيەتى» (English Language & Literature) ءپانى بويىنشا تاعى دا ۇزدىك ناتيجە 93-ورىن (قازاقستان بويىنشا 1 ورىن)، بۇل وتكەن جىلعى كورسەتكىشتەن 2 ورىنعا جوعارى. العاش رەت 3 پاندىك سالا اتاپ ءوتىلدى: قازاقستان بويىنشا 1ء-شى ورىن العان «فيلوسوفيا» (Philosophy)، «قازىرگى تىلدەر» (Modern Languages) - قازاقستان بويىنشا 3 ورىن، جانە «ونەر جانە ديزاين» (Art & Design) بويىنشا قازاقستاندا 3 ورىن. ايتا كەتۋ كەرەك، ولاردىڭ العاشقى ەكەۋى بىردەن 101-150 پوزيسيالارىندا، بۇل الەمدىك جۇزدىككە كىرۋىمىزگە تەك «ءبىر قادام» قالعانىن كورسەتەدى. ءۇشىنشى ءپان 201-240 ورىندا. سونىمەن قاتار، بىرنەشە جىل قاتارىنان «ءتىل ءبىلىمى» (Linguistics) ءوز ورنىن ساقتاپ قالدى - 201-240.
وسىلايشا، رەيتينگكە ەنگەن 7 ءپاننىڭ ىشىندە ۇزدىك 100-گە «ءبىلىم بەرۋ جانە وقىتۋ» جانە «اعىلشىن ءتىلى»، ۇزدىك 200-گە «قازىرگى تىلدەر» جانە «فيلوسوفيا»، ۇزدىك 300-گە «ونەر» جانە «ءتىل ءبىلىمى»، «قۇقىقتانۋ»، سونىمەن قاتار كەڭ ساناتتاعى «ونەر جانە گۋمانيتارلىق عىلىمدار» توپ 400-گە كىردى.
اباي اتىنداعى قازۇپۋ-دىڭ جەتىستىگى عىلىمي زەرتتەۋلەر ساپاسىنىڭ جاقسارۋىنىڭ ارقاسىندا مۇمكىن بولا الدى، ال بۇعان بۇرىن رەيتينگكە ەنگىزىلگەن پاندەر بويىنشا ەسەپتەلگەن «دايەكسوز كورسەتكىشى» جانە «حيرش يندەكسى» كورسەتكىشتەرىنىڭ وڭ ديناميكاسى دالەل. جاڭا پاندەردىڭ باعالانۋى عىلىمي باسىلىمداردىڭ شەكتى ماندەردەن جوعارى ءوسۋى ارقىلى قول جەتكىزىلدى، ال ولاردىڭ جوعارى ورىندارى، باسقالارمەن قاتار، ۋنيۆەرسيتەتتىڭ اكادەميالىق بەدەلىنىڭ وسۋىمەن قامتاماسىز ەتەدى.
ايتا كەتۋ كەرەك، ۋنيۆەرسيتەت بۇل رەيتينگكە 2021 جىلى قاتىسا باستادى جانە بىرنەشە جىل ىشىندە رەيتينگتىك پاندەر سانىن 2-دەن 7-گە دەيىن ارتتىردى. ۋنيۆەرسيتەتتىڭ پەداگوگيكالىق زەرتتەۋ ۋنيۆەرسيتەتىنە اينالۋ كەزەڭىندەگى بۇل ىلگەرىلەۋ ديناميكاسىندا جاھاندىق اكادەميالىق قوعامداستىققا تابىستى ينتەگراسيالاۋعا، الەمدىك ءبىلىم بەرۋ كەڭىستىگىندە Abai University ۇلتتىق برەندىنىڭ بەدەلى مەن تانىمىنىڭ وسۋىنە ۇلەس قوساتىن وقۋ جانە عىلىمي-زەرتتەۋ قىزمەتىنىڭ جوعارى ساپاسىنىڭ داۋسىز دالەلى.