ۇبت تاپسىرۋ ۋاقىتى 40 مينۋتقا ۇزارتىلدى.
قازاقستاندا ۇبت باستالعاننان بەرى 90 مىڭنان استام تالاپكەر تەست تاپسىردى، دەپ حابارلايدى Almaty-akshamy.kz بعم باسپا ءسوز قىزمەتىنە سىلتەمە جاساپ.
ونىڭ ىشىندە تۇلەكتەردىڭ 74،7%-ى قازاق تىلىندە، 25،2%-ى ورىس تىلىندە، 0،1%-ى اعىلشىن تىلىندە تەستىلەۋدەن ءوتتى.
ۇبت باستالعالى شەكتى بالدى 67%-عا جۋىق تالاپكەر جينادى. ورتاشا بالعا كەلەتىن بولساق، ول 65 بالل.
تالاپكەرلەردىڭ، سونىڭ ىشىندە ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن ۇبت تاپسىرۋ ۋاقىتى 40 مينۋتقا ۇزارتىلدى. سونىمەن قاتار، ولار ءۇشىن سىزبا جانە دياگراممالارسىز سۇراقتار جاسالدى. قابىلدانعان شارالار ارقاسىندا ەرەكشە ءبىلىم بەرۋ قاجەتتىلىكتەرى بار تەستىلەنۋشىلەر سانى ارتىپ كەلەدى. ەگەر 2021 جىلى نەگىزگى ۇبت-عا 90 بالا قاتىسسا، بيىل ءۇش اپتا ىشىندە تەستىلەۋگە ەرەكشە ءبىلىم بەرۋ قاجەتتىلىگى بار 310 بالا قاتىستى.
جالپى، نەگىزگى ۇلتتىق ءبىرىڭعاي تەستىلەۋگە قاتىسۋعا 290 مىڭعا جۋىق ءوتىنىش كەلىپ ءتۇستى. ەستەرىڭىزگە سالا كەتەيىك، مەملەكەتتىك ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇبت 16 مامىردا باستالىپ، 2022 جىلعى 5 شىلدەگە دەيىن جالعاسادى. بۇل رەتتە تالاپكەرلەر تەستىلەۋ ورنى مەن ۋاقىتىن وزدەرى تاڭدادى.
بيىل تالاپكەرلەرگە ىڭعايلى بولۋ ءۇشىن العاش رەت ۇبت-نىڭ كۇنىن، ۋاقىتىن، ورنى مەن بەيىندىك پاندەرىن ەسكە سالاتىن SMS جولداناتىن بولادى. حابارلاما ۇبت-عا قاتىسۋشىلاردىڭ وزدەرىنە، سونداي-اق كامەلەتتىك جاسقا تولماعان تەستىلەنۋشىلەردىڭ اتا-انالارىنا نەمەسە زاڭدى وكىلدەرىنە جىبەرىلەدى.
اكادەميالىق ادالدىقتى ساقتاۋ ماقساتىندا تالاپكەرلەردىڭ تەست نۇسقاسى تاڭبالاندى. ياعني ۇبت-نىڭ ءاربىر قاتىسۋشىسىنىڭ جەكە تەست نۇسقاسى بولادى. ەرەجەلەردى بۇزعان جانە تەست تاپسىرمالارىن اۋديتوريادان شىعارۋعا تالپىنعان جاعدايدا ۇلتتىق تەستىلەۋ ورتالىعى ەرەجە بۇزۋشىلاردى انىقتاپ، ولاردىڭ ناتيجەلەرىن جويادى.
119 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 118 ادام شىعارىلىپ، ولاردىڭ ناتيجەلەرى جويىلدى.
ەستەرىڭىزگە سالا كەتەيىك، ۇبت-عا كىرگىزۋ ءۇش دەڭگەيلى جۇيە بويىنشا جۇزەگە اسىرىلادى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي-اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى. بيىل تەستىلەۋ «1 كومپيۋتەر – 2 كامەرا – 1 تەستىلەنۋشى» قاعيداتى بويىنشا وتەدى. ەگەر بۇعان دەيىن تەستىلەۋ پروسەسىن ءار كومپيۋتەردىڭ جوعارعى جاعىنان باقىلاپ وتىراتىن ءبىر كامەرا عانا بولسا، ەندى تەستىلەنۋشىنىڭ جەكە باسىن سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (فرونتالدى) كامەرا ورناتىلعان.
«وتكەن جىلى Face-ID جۇيەسى مەن باقىلاۋدى كۇشەيتۋدىڭ ناتيجەسىندە بوگدە ادامداردى كىرگىزۋگە تىرىسقان 18 جاعداي انىقتالدى. بيىل ءبىز العاش رەت بوگدە ادامداردى كىرگىزۋگە تىرىسۋ فاكتىسىن تىركەدىك. ۇبت-نىڭ ءۇشىنشى اپتاسىندا قاتىسۋشى ءوزىنىڭ ورنىنا باسقا تۇلعانى جىبەرگەن. ۇبت-عا كىرگىزۋ بارىسىندا Face-ID جەكە باسىن سايكەستەندىرۋ جۇيەسى بوگدە ادامدى انىقتادى. ءتيىستى ءىس-شارالار قابىلداندى، تەستىلەنۋشى مەن تەستىلەۋگە كىرۋگە تالپىنعان بوگدە تۇلعا بويىنشا دەرەك قۇقىق قورعاۋ ورگاندارىنا جىبەرىلەدى»، – دەپ اتاپ ءوتتى بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ايتا كەتەيىك، تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.