اqshamnews.kz رەداكسياسى "كۇن سانى" ايدارىندا اپتانىڭ ەڭ ماڭىزدى دەرەكتەرىنە شولۋ جاسادى.
الەم چەمپيوناتى: 10 مەدال، ونىڭ جەتەۋى - التىن
قازاقستان قۇراماسى ليۆەرپۋلدە وتكەن بوكستان الەم چەمپيوناتىندا 10 مەدال جەڭىپ الدى، ونىڭ جەتەۋى - التىن. ناتيجەسىندە وتانداستارىمىز جالپىكوماندالىق ەسەپتە ءبىرىنشى ورىنعا جايعاستى (جەتى التىن، ءبىر كۇمىس جانە ەكى قولا).
قازاقستان قۇراماسى الەم چەمپيوناتىن جەتى التىن مەدالمەن اياقتادى:
- ءبىرىنشى ورىن يەلەنگەندەر: الۋا بالقىبەكوۆا (51 كەلىگە دەيىن)، سانجار تاشكەنباي (50 كەلىگە دەيىن)، ماحمۇد سابىرحان (55 كەلىگە دەيىن)، ايدا ابىكەيەۆا (65 كەلىگە دەيىن)، ناتاليا بوگدانوۆا (70 كەلىگە دەيىن)، تورەحان سابىرحان (70 كەلىگە دەيىن)، ايبەك ورالباي (90 كەلىدەن جوعارى) .
- نازىم قىزايباي (48 كەلىگە دەيىن) كۇمىس جۇلدەگەر اتاندى. ۆيكتوريا گرافەيەۆا (60 كەلىگە دەيىن) مەن ەلدانا ءتالىپوۆا (80 كەلىدەن جوعارى) قولا جۇلدە ەنشىلەدى.
200-دەن اسا جوباعا 1،2 ترلن تەڭگە بولىنەدى
قازاقستاندا ءۇش جىلدىق كەزەڭدە جالپى سوماسى 1،2 ترلن تەڭگە بولاتىن 200-دەن اسا جوبا قارجىلاندىرىلاتىن بولادى. بۇل تۋرالى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مەملەكەت باسشىسىنىڭ جولداۋىن جۇزەگە اسىرۋ جونىندەگى جالپىۇلتتىق جوسپاردى تانىستىرۋ كەزىندە حابارلادى.
اگروونەركاسىپتىك كەشەندەگى ينۆەستيسيالارعا تاپسىرىس" باستاماسى اياسىندا 5%-دىق جەڭىلدەتىلگەن كرەديت بەرۋ باعىتىن كەڭەيتۋ جوسپارلانۋدا، ال "دامۋ" قورى اگروبيزنەستىڭ قارىزدارىنا 80%-عا دەيىن كەپىلدىك بەرەتىن بولادى.
قازاقستانداعى ەڭ جوعارى زەينەتاقى - 993 مىڭ تەڭگە
2025 جىلعى 1 تامىزداعى جاعداي بويىنشا قازاقستاندا جاس بويىنشا بەرىلەتىن ايلىق ورتاشا تولەم – نەبارى 35،7 مىڭ تەڭگە. دەگەنمەن، ەڭ جوعارعى سوماعا شەكتەۋ قويىلماعان، كەيبىر ازاماتتاردىڭ زەينەتاقىسى 900 مىڭ تەڭگەدەن اسادى.
قازاقستانداعى ەڭ جوعارعى 5 زەينەتاقى تولەمى (2025 جىلعى 1 قىركۇيەككە):
-
993 041 تەڭگە
-
818 818 تەڭگە
-
635 236 تەڭگە
-
565 857 تەڭگە
-
560 437 تەڭگە
مەكتەپ ماڭىنداعى باعدارشامدار مەن جول بەلگىلەرى
ىشكى ىستەر ءمينيسترىنىڭ ورىنباسارى يگور لەپەحا ۇكىمەت وتىرىسىندا ءبىلىم بەرۋ نىساندارىنىڭ ماڭىنا قاجەتتى جول ينفراقۇرىلىمدارىن ورناتۋدى قاداعالاۋ جۇمىستارى تۋرالى باياندادى. ول بۇل ماسەلە ەرەكشە باقىلاۋدا ەكەنىن اتاپ ءوتتى.
مەكتەپتەردىڭ ماڭىندا 54 جاياۋ جۇرگىنشىلەر باعدارشامى، 1 مىڭنان استام جاساندى كەدەرگى، 8 مىڭعا جۋىق جول بەلگىسى مەن اقپاراتتىق پاننو، 180 شاقىرىم قورشاۋ ورناتىلىپ، 248 اۆتوتۇراق سالىنعان.
"الايدا، رەسپۋبليكا بويىنشا ءالى دە 70 رەتتەلەتىن جاياۋ جۇرگىنشىلەر باعدارشامى، 350-گە جۋىق جاساندى كەدەرگى جانە 400 جول بەلگىسى قاجەت"، — دەدى يگور لەپەحا.