قازاقستاندا كوپبالالى وتباسىلارعا جانە بوسانۋ، بالا كۇتىمىنە بايلانىستى تابىسىنان ايىرىلعان ازاماتتارعا مەملەكەتتەن بەرىلەتىن الەۋمەتتىك تولەمدەر كولەمى جىل سايىن ارتىپ كەلەدى. بۇل – ءبىر جاعىنان الەۋمەتتىك قولداۋ جۇيەسىنىڭ كەڭەيىپ كەلە جاتقانىن، ەكىنشى جاعىنان ەلىمىزدە مۇنداي كومەككە مۇقتاج وتباسىلاردىڭ سانى ازايماي وتىرعانىن كورسەتەدى. اqshamnews.kz ءتىلشىسى ماتەريالدا دەكرەتتەگى انالار مەن اكەلەردىڭ جانە كوپ بالالى انالارعا بەرىلەتىن كومەك تۋرالى تىڭ دەرەكتەردى تارقاتادى.
كوپبالالى وتباسىلار سانى - 600 مىڭنان استى
ەڭبەك جانە حالىقتى الەۋمەتتىك قولداۋ مينيسترلىگى (ەحاق - ەسك.) ەلىمىزدەگى كوپ بالالى وتباسلاردىڭ سانىن ۇسىندى. ولار قازاقستان رەسپۋبليكاسىنىڭ الەۋمەتتىك كودەكسىنىڭ 90-بابىنا سايكەس، بىرگە تۇراتىن ءتورت جانە ودان دا كوپ كامەلەتكە تولماعان بالاسى بار، سونىمەن قاتار 23 جاسقا دەيىن كۇندىزگى بولىمدە وقيتىن بالالارى بار وتباسىلارعا رەسپۋبليكالىق بيۋدجەت ەسەبىنەن ارنايى جاردەماقى تولەنەتىنىن ايتتى. بۇل جۇيە 2020 جىلدان باستاپ ەنگىزىلىپ، جاردەماقى مولشەرى بالا سانىنا قاراي سارالانىپ ەسەپتەلەدى.
2025 جىلعى 1 مامىرداعى جاعداي بويىنشا بۇل جاردەماقىنى 611،5 مىڭ وتباسى الىپ وتىر. بۇل 2019 جىلعى كورسەتكىشپەن (252،1 مىڭ) سالىستىرعاندا 2،3 ەسەگە ارتىق. جىلدار بويىنشا ديناميكا مىناداي:
ينفوگرافيكا: aqshamnews.kz
بۇل ءوسىم، ءبىر جاعىنان، جاردەماقى بەرۋ جۇيەسىنىڭ جەڭىلدەۋىمەن جانە رەسىمدەۋ مەحانيزمدەرىنىڭ جەڭىلدەتىلۋىمەن بايلانىستى. دەگەنمەن بۇل ەلدەگى دەموگرافيالىق وزگەرىستەر مەن الەۋمەتتىك جاعدايدىڭ دا كورسەتكىشى.
جاردەماقىنىڭ ورتاشا مولشەرى نەشە تەڭگە؟
ەحاق بەرگەن مالىمەتكە سەنسەك، 2025 جىلدىڭ العاشقى ءتورت ايىندا جۇكتىلىك پەن بوسانۋعا، جاڭا تۋعان بالانى اسىراپ الۋعا بايلانىستى تابىسىنان ايىرىلعانى ءۇشىن 81،8 مىڭ ادام الەۋمەتتىك تولەم العان. بۇل تولەمدەردىڭ ورتاشا مولشەرى – 1 690 493 تەڭگە.
سونىمەن قاتار، بالا ءبىر جارىم جاسقا تولعانعا دەيىنگى كۇتىمگە بايلانىستى تابىسىنان ايىرىلعانى ءۇشىن 489،1 مىڭ ادام جاردەماقى العان. بۇل ساناتتاعى تولەمنىڭ ورتاشا مولشەرى 85 221 تەڭگە.
دەكرەتتەگى اكەلەر سانى قانشا؟
اتالعان تولەم الۋشىلاردىڭ 99،8%-ىن ايەلدەر قۇرايدى. ياعني، بۇل ساناتتا 488 230 ايەل جانە نەبارى 863 ەر ادام عانا بار. بۇل گەندەرلىك تەڭسىزدىكتى ەمەس، كوبىنە بالا كۇتىمىمەن ۇيدە انالاردىڭ قالاتىنىن، ال اكەلەردىڭ ەڭبەك نارىعىنان شىقپايتىنىن كورسەتەدى.
ەسكە سالايىق، بۇعان دەيىن دەكرەتكە شىققان قازاقستاندىق اكەنىڭ اڭگىمەسىن جاريالاعان بولاتىنبىز. ول ءوزىنىڭ دەكرەتتەگى ءومىرىن اڭگىمەلەپ، بۇل شەشىمگە قالاي كەلگەنىن ايتىپ بەرگەن ەدى.