بالانى تىڭداۋ، وعان ءتۇسىندىرۋ - ەڭ ءتيىمدى تاربيە قۇرالى. مۇنى پسيحولوگ پەن بالا تاربيەسىنە ءمان بەرەتىن ماماندار ءجيى ايتادى. الايدا "بالا تاياقپەن عانا دۇرىستالادى" دەگەن تۇسىنىكتە قالعان اتا-انالار بار. ءبىز مەكتەپ پسيحولوگى اياۋلىم باقىتوۆامەن سۇحباتتاسىپ، نەگە بالاعا قول كوتەرۋ دۇرىس ەمەسىن، زاماناۋي تاربيە تاسەلدەرىن سارالادىق.
اياۋلىم ورال قىزى بالامەن قارىم-قاتىناستا شالۆا ءاموناشۆيليدىڭ ىزگىلىك پەداگوگيكاسى قاعيدالارىن باسشىلىققا الۋ قاجەتىن ايتادى. بۇل تاسىلدە ەڭ باستىسى – بالانىڭ ىشكى الەمىن ءتۇسىنىپ، قۇرمەتپەن قاراۋ.
"ىزگىلىكتى قارىم-قاتىناس، ىزگىلىكتى پەداگوگيكا — بالانىڭ ىشكى جان دۇنيەسىنە قۇرمەتپەن قاراپ، ونىڭ تابيعي قابىلەتتەرىن اشۋعا باعىتتالعان تاربيە جۇيەسى. بۇل ءادىس بالانى جازالاۋ ارقىلى ەمەس، ماحاببات پەن سەنىم ارقىلى تاربيەلەۋدى كوزدەيدى. ءاموناشۆيليدىڭ ايتۋىنشا، ءبىلىم ادامعا جۇرەك پەن اقىل ارقىلى بەرىلەدى، ويتكەنى ول ادام جانىنا سۇيىسپەنشىلىك ارقىلى جول تابادى"، - دەيدى مامان.
ىزگىلىككە قۇرىلعان ورتا – بالا دامۋىنىڭ كەپىلى. بالانى ۇرماي تاربيەلەۋ ءۇشىن وتباسىندا جانە مەكتەپتە ءقاۋىپسىز، جىلى ورتا قالىپتاسۋى قاجەت. مۇنداي ورتادا بالا ءوزىن ەركىن سەزىنىپ، ويىن اشىق جەتكىزەدى، ىشكى تەبىرەنىسىن ءبولىسىپ، ارمانىن ايتادى.
ال فيزيكالىق كۇش كورسەتۋ:
- بالانىڭ ءوزىن-وزى تومەن باعالاپ؛
- قورقىنىش پەن اگرەسسيانى تۋدىرادى؛
- اتا-انا مەن بالا اراسىنداعى سەنىمدى السىرەتەدى؛
- قوعامدىق نورمالار مەن قۇندىلىقتاردى قابىلداۋىن تەجەيدى.
"ىزگىلىككە نەگىزدەلگەن تاربيە ادىستەرى بالانىڭ تۇلعا بولىپ قالىپتاسۋىنا، ونىڭ الەۋەتىن تولىق اشۋعا مۇمكىندىك بەرەدى"، - دەيدى ول.
زاماناۋي تاربيە تاسىلدەرى – بالانى ەركەلەتۋ ەمەس. بۇل – ناقتى شەكارا مەن جۇيەنى ساقتاپ، بالاعا تۇسىنىستىكپەن قاراۋ. بۇگىندە پوزيتيۆ تاربيە، ەموسيونال ينتەللەكت جانە مەيىرىمدى، ءبىراق تالاپشىل قارىم-قاتىناس ۇعىمدارى الدىڭعى قاتاردا.
بالانى ۇرماي، قالاي تارتىپكە شاقىرۋعا بولادى؟
-
اشۋىڭىز كەلگەندە الدىمەن سابىرعا كەلىڭىز. ەموسيامەن قابىلدانعان شەشىم ەشقاشان دۇرىس بولمايدى.
-
ءتۇسىندىرۋ ارقىلى ۇيرەتىڭىز. بالا "نەنى" ەمەس، "نەگە" دەگەندى تۇسىنگەندە عانا تاربيە الادى.
-
جاۋاپكەرشىلىك ارتىڭىز. بالاعا سەنىپ تاپسىرىلعان ىستەر ونىڭ وزىندىك قۇندىلىعىن ارتتىرادى.
-
شەكارانى ناقتىلاڭىز. بالاعا نەنىڭ دۇرىس، نەنىڭ بۇرىس ەكەنىن ءتۇسىندىرۋ ماڭىزدى.