قارۋلى كۇشتەردىڭ بۇل اۋقىمدى ءتۇرى 1993 جىلى ساۋىردە ورتا ازيا اسكەري وكرۋگىنىڭ 40-شى جالپىاسكەري ارمياسىنىڭ بازاسىندا قۇرىلدى.
قۇرلىق اسكەرلەرى ەلدىڭ اۋماقتىق تۇتاستىعى مەن ەگەمەندىگىن قورعاۋ ءۇشىن اسكەرلەردىڭ جاۋىنگەرلىك ازىرلىگىن قولداۋدا نەگىزگى مىندەت اتقارادى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
ولار قاجەت بولعان كەزدە تەحنوگەندىك جانە تابيعي سيپاتتاعى توتەنشە جاعدايلاردىڭ سالدارىن جويۋ مەن مەملەكەتتىك جانە اسكەري نىسانداردى كۇزەتۋگە دە قاتىسادى.
قۇرلىق اسكەرلەرىنىڭ قۇرامىنا «استانا»، «شىعىس»، «باتىس»، «وڭتۇستىك» وڭىرلىك قولباسشىلىقتارى، تىلدىق جانە تەحنيكالىق قامتاماسىز ەتۋ قۇرامالارى مەن بولىمدەرى، قۇرلىق اسكەرلەرىنىڭ اسكەري ينستيتۋتى، شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى كىرەدى.
اسكەر ءتۇرى قارۋ-جاراق پەن اسكەري تەحنيكانىڭ، جوعارى دالدىكتەگى قارۋلاردىڭ، بايلانىس، بارلاۋ جانە اۆتوماتتاندىرىلعان باسقارۋ جۇيەلەرىنىڭ قازىرگى زامانعى ۇلگىلەرىمەن جابدىقتالعان. ەلىمىزدىڭ قورعانىس-ونەركاسىپتىك كەشەنى كاسىپورىندارىندا ت-72 تانكتەرىن، اۋە شابۋىلىنا قارسى قورعانىس اسكەرلەرىنىڭ جىلجىمالى باسقارۋ پۋنكتەرىن جانە باقىلاۋ-تەكسەرۋ ماشينالارىن جاڭعىرتۋ جۇمىستارى جۇرگىزىلۋدە.
قازىرگى زامانعى سىن-تەگەۋرىندەر مەن قاۋىپ-قاتەرلەردى ەسكەرە وتىرىپ، اسكەرلەردە ءبىرقاتار باعىتتار بويىنشا جاۋىنگەرلىك دايىندىق باعدارلامالارى قايتا قارالدى. زەرتتەۋ وقۋ-جاتتىعۋلارى بارىسىندا جاۋىنگەرلىك ءىس-قيمىلداردى جۇرگىزۋدىڭ جاڭا ادىستەرى مەن تاسىلدەرى سىناقتان وتكىزىلۋدە. جالپى جاۋىنگەرلىك دايىندىقتىڭ قارقىندىلىعى بىرنەشە ەسە ءوستى دەپ ايتۋعا بولادى.
قۇرلىق اسكەرلەرىنىڭ جەكە قۇرامى رەسپۋبليكالىق «شىعىس»، «باتىل تويتارىس»، «ايبالتا»، «كوكجال»، حالىقارالىق «ءوزارا ءىس-قيمىل»، «مىزعىماس باۋىرلاستىق، «بەيبىت ميسسيا»، «ىزدەۋ»، «كازيند» جانە باسقا دا كوپتەگەن وقۋ-جاتتىعۋلارعا قاتىستى.
بيىل «وڭتۇستىك» وڭىرلىك قولباسشىلىعى اسكەرلەرىنىڭ اسكەري قىزمەتشىلەرى «پاكىستان ارمياسىنىڭ كوماندالىق رۋحى – 2024» حالىقارالىق جارىسىندا دالالىق ماشىقتىڭ، پسيحولوگيالىق تۇراقتىلىق پەن كۇش-قۋات توزىمدىلىگىنىڭ جوعارى دەڭگەيىن كورسەتىپ، جەڭىمپاز اتاندى.
اسكەري كادرلاردى، اسىرەسە زىمىران اسكەرلەرى مەن ارتيللەريا ماماندارىن، بارلاۋشىلاردى، اۋە شابۋىلىنا قارسى قورعانىس، ينجەنەرلىك اسكەرلەر، رادياسيالىق جانە حيميالىق قورعانىس ماماندارىن دايىنداۋ جۇيەسىن جەتىلدىرۋگە كوپ كوڭىل بولىنۋدە.
قارۋلى كۇشتەردىڭ بۇل تۇرىنە كادر دايىنداۋ الماتىداعى قۇرلىق اسكەرلەرىنىڭ اسكەري ينستيتۋتىندا، اقمولا وبلىسىنىڭ ششۋچينسك قالاسىنداعى اسكەري كوللەدجدە جانە گۆاردەيسك گارنيزونىنداعى كىشى ماماندار دايىندايتىن وقۋ ورتالىعىندا جۇزەگە اسىرىلادى.
جوعارى ۇتقىر، تەحنيكالىق تۇرعىدا جابدىقتالعان جانە جاۋىنگەرلىك قابىلەتتى قۇرلىق اسكەرلەرى ەلدىڭ ەگەمەندىگىن، اۋماقتىق تۇتاستىعىن جانە ونىڭ ازاماتتارىنىڭ بەيبىت ءومىرىن قورعاۋعا ءاردايىم دايىن. سۋ تاسقىنىنان تۋىنداعان توتەنشە جاعدايدا اسكەري قىزمەتشىلەر ەل ايماعىندا تۇرعىندارعا كومەك كورسەتىپ، ەلدى مەكەندەر مەن ماڭىزدى ينفراقۇرىلىم نىساندارىن قورعاۋ مىندەتتەرىن ورىنداپ جاتىر.