بوستاندىق اۋدانى قورعانىس ىستەرى جونىندەگى باسقارماسىنىڭ اسكەري قىزمەتشىلەرى ۇلى وتان سوعىسىنا قاتىسقان ليۋبوۆ نيكولايەۆنا گوركوۆسكايانى تۋعان كۇنىمەن قۇتتىقتاپ باردى، دەپ حابارلايدى Almaty-akshamy.kz.
ليۋبوۆ نيكولايەۆنا 1925 جىلى 20 ساۋىردە ۋكراينانىڭ لۋگانسك وبلىسىندا دۇنيەگە كەلگەن. ول نەمىس باسقىنشىلارىنىڭ باسىپ الۋ كەزەڭىنە بايلانىستى اۋىر سىناقتاردى كوردى.
1943 جىلى قىز مايدانعا ءوز ەركىمەن اتتاندى. اسكەري بايلانىسشى كۋرسىن ءتامامداعاننان كەيىن ول ءبىرىنشى ۋكراينا مايدانى جاياۋ اسكەر ديۆيزياسى التىنشى پولكىنىڭ بولىمشەسىنە قابىلداندى.
حاركوۆ ماڭىنداعى ۇرىس كەزىندە ليۋبوۆ گوركوۆسكايا قىزمەت ەتكەن ديۆيزيا قورشاۋعا الىندى. الايدا، 1944 جىلى ساۋىردە اسكەري ءبولىم جاۋدىڭ قورشاۋىنان شىعىپ، قارسىلاس قولىنان ازات ەتىلگەن سيەۆاستوپولگە شىعا الدى. سودان كەيىن ەرجۇرەك بايلانىسشى قىز بەلارۋس جانە بالتىق جاعالاۋىندا باستالعان شايقاستارعا دا قاتىستى.
جاۋىنگەرلىك ەڭبەگى ءۇشىن ليۋبوۆ نيكولايەۆنا I جانە II دارەجەلى وتان سوعىسى وردەندەرىمەن قوسا، باسقا دا وردەندەرمەن جانە مەدالدارمەن ماراپاتتالدى. جەڭىس تۋرالى كوپتەن كۇتكەن حاباردى ول بالتىق جاعالاۋىندا ەستىدى.
سوعىس اياقتالعاننان كەيىن تۋعان جەرىنە ورالىپ، حالىققا ءبىلىم بەرۋ بولىمىندە جۇمىس ىستەدى. 1946 جىلى جۇبايىمەن بىرگە قازاقستانعا كوشىپ، ەڭبەك جولىن جالعاستىردى.
ليۋبوۆ نيكولايەۆنانىڭ ەكى بالاسى بار. ءقازىر نەمەرەسىمەن بىرگە تۇرادى. سۇراپىل جىلدار سىناعى دەنساۋلىعىنا اسەر ەتپەي قويمادى. سوندىقتان جەرگىلىكتى اسكەري باسقارۋ ورگاندارىنىڭ اسكەري قىزمەتشىلەرى ارداگەرگە ۇنەمى بارىپ، وعان قولداۋ كورسەتۋگە تىرىسادى. اسكەريلەر ءۇشىن، ونىڭ وتباسى مەن اينالاسىنداعىلار ءۇشىن ليۋبوۆ نيكولايەۆنانىڭ ءومىرى باتىلدىقتىڭ، توزىمدىلىكتىڭ جانە ومىرگە دەگەن سۇيىسپەنشىلىكتىڭ ۇلگىسى بولىپ قالا بەرەدى.