ورتالىق كوممۋنيكاسيالار قىزمەتىنىڭ الاڭىندا وتكەن بريفينگتە الماتى قالاسىنىڭ اكىمى دارحان ساتىبالدى مەگاپوليستەگى كولىك كەپتەلىسى ماسەلەسى قوعامدىق كولىكتى جۇيەلى دامىتۋ ارقىلى شەشىلىپ جاتقانىن ايتتى.
اكىمنىڭ ايتۋىنشا، كولىك قوزعالىسىنىڭ شامادان تىس جۇكتەمەسى قالانىڭ ەكولوگيالىق جاعدايىنا تىكەلەي اسەر ەتەدى. سوندىقتان جەكە اۆتوكولىكتەرگە بالاما رەتىندە قوعامدىق كولىكتى دامىتۋعا باسىمدىق بەرىلىپ وتىر.
"بۇل – كۇردەلى ماسەلە. كەپتەلىس ەكولوگياعا تىكەلەي اسەر ەتەدى، سەبەبى كولىكتەر اۋاعا تارايتىن زياندى زاتتاردىڭ 60%-ىن شىعارادى. ءبىز شانحاي، لوندون جانە ماسكەۋ سەكىلدى قالالاردىڭ تاجىريبەسىن زەردەلەدىك. ماسكەۋدە 2016 جىلى جەكە اۆتوكولىكتى پايدالانۋشىلاردىڭ ۇلەسى 60% بولسا، بۇگىندە بۇل كورسەتكىش 30%-عا دەيىن تومەندەدى، ال قالعان 70% تۇرعىن قوعامدىق كولىكتى پايدالانادى. سوندىقتان كەپتەلىس ماسەلەسىنىڭ ءبىر عانا شەشىمى بار"، – دەدى دارحان ساتىبالدى.
اكىمنىڭ ايتۋىنشا، ماسەلەنى شەشۋدىڭ ءتيىمدى جولىنىڭ ءبىرى – جىلدام جۇرەتىن قوعامدىق كولىك باعىتتارىن دامىتۋ. "بىرىنشىدەن، BRT جەلىلەرىن تەز ءارى سالىستىرمالى تۇردە وڭاي ىسكە قوسۋعا بولادى. سونىمەن قاتار LRT جوباسى دا دايىندالىپ جاتىر، بۇل باعىتتار قاتار جۇزەگە اسىرىلادى"، – دەدى ول.
قالا باسشىسى مەترونىڭ دامۋىنا دا جەكە توقتالدى. ونىڭ ايتۋىنشا، قازىرگى ۋاقىتتا ءبىرقاتار نىسانداردى اياقتاۋ مەرزىمدەرى قايتا قارالىپ جاتىر.
"ماۋسىم ايىندا مەتروعا بارعانىمدا ماعان "قالقامان" بەكەتىن اياقتاۋعا 24 اي قاجەت دەلىنگەن. ءقازىر بۇل جۇمىستاردى 8-9 ايدا ءبىتىرۋ جوسپارلانىپ وتىر. مۇنداي جوبالاردى جەدەل جۇزەگە اسىرۋ كەرەك"، – دەدى اكىم.
ونىڭ ايتۋىنشا، قالا مەتروپوليتەندى كەڭەيتۋدى جالعاستىرىپ جاتىر. "كەلەسى جىلى "قالكامان" بەكەتى مەن "بارلىق" بازارى اراسىنداعى 5،3 شاقىرىمدىق مەترو جەلىسىنىڭ قۇرىلىسى باستالادى. سونداي-اق "جىبەك جولى" بەكەتىنەن اۋەجايعا دەيىنگى 14 شاقىرىمدى قامتيتىن ەكىنشى جەلى جوباسى ازىرلەنىپ جاتىر"، – دەدى دارحان ساتىبالدى.
ءسوز اياعىندا اكىم مەترو مەن قوعامدىق كولىك دامىماي، قالاداعى كولىك كەپتەلىسى ماسەلەسىن شەشۋ مۇمكىن ەمەس ەكەنىن اتاپ ءوتتى.