الماتىدا مەملەكەت باسشىسىنىڭ 2،5 ملن اعاش ەگۋ جونىندەگى تاپسىرماسىن ىسكە اسىرۋ جالعاسىپ كەلەدى. بۇل تۋرالى الماتى قالاسىنىڭ اكىمى دارحان ساتىبالدى قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگ بارىسىندا جۋرناليست سۇراعىنا جاۋاپ بەرە وتىرىپ مالىمدەدى.
اكىمنىڭ ايتۋىنشا، كوگالداندىرۋ باعدارلاماسى 2030 جىلعا دەيىن ەسەپتەلگەن جانە بۇگىنگى تاڭدا جوسپارلانعان كولەمنىڭ جارتىسى ورىندالعان. كەلەسى كەزەڭ اياسىندا قالادا قوسىمشا شامامەن 1،3 ملن اعاش پەن بۇتا ەگۋ كوزدەلىپ وتىر.
الماتى اكىمى قالادا كوگالداندىرۋعا قاتىستى تاسىلدەر قايتا قارالىپ جاتقانىن اتاپ ءوتتى. اتاپ ايتقاندا، ساندىق كورسەتكىشتەرگە عانا ەمەس، ەگىلەتىن ماتەريالدىڭ ساپاسىنا دا باسىمدىق بەرىلىپ وتىر.
"ءبىز ەگۋ تەحنولوگياسىن وزگەرتەمىز جانە ءىرى كولەمدى اعاشتاردى قولدانۋعا كوشەمىز. ساراپشىلارمەن بىرلەسىپ، قالالىق ەكولوگيا مەن جوعارى كولىك جۇكتەمەسى جاعدايىندا جاقسى بەيىمدەلەتىن اعاش تۇرلەرى ىرىكتەلىپ جاتىر. الداعى ۋاقىتتا سانعا ەمەس، جاسىل جەلەكتىڭ ساپاسى مەن توزىمدىلىگىنە باسىمدىق بەرىلەدى"، – دەدى قالا باسشىسى.