الماتى اكىمى ەربولات دوسايەۆ بوستاندىق اۋدانىنىڭ تۇرعىندارىمەن كەزدەسۋدە جول-كولىك ينفراقۇرىلىمىن جاڭارتۋ جانە جولاۋشىلار تاسىمالى ساپاسىن ارتتىرۋ بويىنشا جۇرگىزىلىپ جاتقان جۇمىستار تۋرالى ايتتى، دەپ حابارلايدى aqshamnews.kz
قالا باسشىسىنىڭ ايتۋىنشا، بىلتىر اۋداندا 33 كوشەدە 30،5 كم جول ورتاشا جوندەۋدەن ءوتتى. بيىل تاعى 26 كوشەدە 30،3 كم جول جوندەلەدى.
سونىمەن قاتار، اعىمداعى جوندەۋ جۇمىستارى اياسىندا 30 مىڭ شارشى مەتر جول توسەمى قالپىنا كەلتىرىلىپ، 32 كم ارىق جۇيەسى سالىندى. 2025 جىلى تاعى 30 مىڭ شارشى مەتر جولدى جوندەۋ جانە 24،4 كم ارىق جۇيەسىن سالۋ جوسپارلانعان.
«ينكليۋزيۆتى ورتانى قۇرۋ ماقساتىندا بيىل مامىر ايىندا 5 جەرۇستى جانە 12 جەراستى جاياۋ جۇرگىنشىلەر وتكەلىنە كۇردەلى جوندەۋ جۇرگىزىلەدى. جوندەۋ بارىسىندا جەدەلساتىلار مەن كوتەرگىش قۇرىلعىلار جاڭارتىلادى. جۇمىس جىل سوڭىنا دەيىن اياقتالادى»، – دەدى ەربولات دوسايەۆ.
كەزدەسۋ بارىسىندا الماتى اكىمى اۋداندا قوعامدىق كولىك قىزمەتىنىڭ ساپاسىن ارتتىرۋ بويىنشا اتقارىلىپ جاتقان جۇمىستار تۋرالى دا حابارلادى. وتكەن جىلى قوعامدىق كولىك پاركى 66 جاڭا اۆتوبۋسپەن تولىقتى، بۇل 25 قولدانىستاعى مارشرۋتتى جاڭارتۋعا جانە قوسىمشا اۆتوبۋس قوسۋعا مۇمكىندىك بەردى. 2025 جىلدىڭ مامىر ايىندا تاعى 18 جاڭا اۆتوبۋس 8 مارشرۋتقا قوسىلادى.
بۇعان قوسا، اۋداندا ءتارتىپ پەن قاۋىپسىزدىكتى قامتاماسىز ەتۋ ماقساتىندا 2024 جىلى 26 «سەرگەك» اپپاراتتىق-باعدارلامالىق كەشەنى جانە 1 100 بەينەباقىلاۋ كامەراسى ورناتىلدى.