الماتى اكىمى ەربولات دوسايەۆ بوستاندىق اۋدانى تۇرعىندارىمەن كەزدەسۋ بارىسىندا قالادا قوعامدىق كەڭىستىكتەردى كوركەيتۋ جانە جايلى قالالىق ورتا قۇرۋ جۇمىستارى جۇيەلى تۇردە جالعاساتىنىن ايتتى، دەپ حابارلايدى aqshamnews.kz
2024 جىلى ءۇش سەرۋەن ايماعىن كوركەيتۋ جۇمىستارى اياقتالدى: اباي داڭعىلىنىڭ تۇرعىت وزال كوشەسىنەن بايزاقوۆ كوشەسىنە دەيىنگى بولىگى، جەلتوقسان كوشەسىنىڭ اباي داڭعىلى مەن ساتبايەۆ كوشەسى اراسىنداعى ۋچاسكەسى جانە اباي مەن گاگارين داڭعىلدارىنىڭ قيىلىسىنداعى سكۆەر.
بۇل جوبالار اياسىندا جاڭا بالالار جانە سپورت الاڭدارى، كوشە جيھازدارى، دەمالىس ورىندارى ورناتىلىپ، جارىقتاندىرۋ جۇيەسى جاڭعىرتىلدى، سونداي-اق جاسىل جەلەك وتىرعىزىلدى.
سونىمەن قاتار، 2024 جىلدىڭ جەلتوقسانىندا گاگارين داڭعىلى بويىنداعى بۋلۆارداعى قۇرىلىس جۇمىستارى اياقتالدى، ال بيىل ءساۋىر ايىندا ونىڭ كوگالداندىرۋ جۇمىستارى اياقتالادى.
«بىلتىر قازان ايىندا ۇلكەن الماتى وزەنىنىڭ جاعالاۋىن سۋ بولگىشتەن اباي داڭعىلىنا دەيىنگى 5،7 شاقىرىمدىق اۋماقتا رەكونسترۋكسيالاۋ جۇمىستارى باستالدى. جوبا اياسىندا بەتون تىرەۋىش قۇرىلىمدارىن تولىق جاڭارتۋ، جاياۋ جۇرگىنشىلەر كوپىرلەرىن، بالالار جانە سپورت الاڭدارىن، كوشە جيھازدارىن ورناتۋ جانە ۆەلوجولاقتار سالۋ قاراستىرىلعان. بۇل جۇمىستاردى 2026 جىلدىڭ ءساۋىر ايىندا اياقتاۋدى جوسپارلاپ وتىرمىز»، – دەدى ەربولات دوسايەۆ.
سونىمەن قاتار، ونىڭ ايتۋىنشا، بيىل مامىر ايىندا تاعى ءۇش قوعامدىق كەڭىستىكتى كوركەيتۋ بويىنشا اۋقىمدى جۇمىس باستالادى. «اتاكەنت» ءقىىو اۋماعىن رەكونسترۋكسيالاۋ (اسفالت جابىندىسى مەن تاس توسەنىشتەردى اۋىستىرۋ، اۆتوماتتى سۋارۋ جۇيەسىن ورناتۋ، جارىقتاندىرۋ مەن كوشە جيھازدارىن جاڭارتۋ)، «وڭتۇستىك» ساياباعىنىڭ سولتۇستىگىندەگى جاسىل ايماقتى كوركەيتۋ (جاياۋ جۇرگىنشىلەر جولىن توسەۋ، كوگالداندىرۋ، جارىقتاندىرۋ جانە كوشە جيھازدارىن ورناتۋ)، نۇر-الاتاۋ شاعىن اۋدانىنداعى سكۆەردى كوركەيتۋ.
سونداي-اق، مامىر ايىندا رەسپۋبليكا الاڭىنداعى سۋبۇرقاق كەشەندەرىنە كۇردەلى جوندەۋ جۇمىستارى باستالىپ، ولاردى 2025 جىلدىڭ قازان ايىندا اياقتاۋ جوسپارلانىپ وتىر.