بۇل تۋرالى قالانىڭ ءۇش جىلدىق بيۋدجەتى بەكىتىلگەن ءماسليحاتتىڭ كەزەكتەن تىس سەسسياسىندا بەلگىلى بولدى. اتالعان قاراجات قالا تۇرعىندارىنىڭ ءومىر ءسۇرۋ ساپاسىن جاقسارتۋعا جانە جايلى قالالىق ورتانى دامىتۋعا باعىتتالادى.
نەگىزگى باعىتتاردىڭ قاتارىندا قالانى كوگالداندىرۋ، قاتتى تۇرمىستىق قالدىقتاردى جيناۋ ينفراقۇرىلىمىن جاقسارتۋ جانە تابيعي نىسانداردى كورىكتەندىرۋ بار.
قالانى كوگالداندىرۋ جوباسى اعاشتار مەن بۇتالاردى وتىرعىزۋدى، سونداي-اق ساياباقتار مەن جاسىل ايماقتاردى كورىكتەندىرۋدى قامتيدى. بيىل الماتىدا بيۋدجەت قاراجاتى ەسەبىنەن 170 مىڭ كوشەت وتىرعىزۋ جوسپارلانعان، ونىڭ 110 مىڭنان استامى كۇزگى ماۋسىمدا وتىرعىزىلدى. بۇل ءاربىر تۇرعىنعا جاسىل جەلەك اۋماعىن 12،5 شارشى مەتردەن 12،8 شارشى مەترگە دەيىن ارتتىرۋعا مۇمكىندىك بەرەدى.
سونىمەن قاتار، 2025 جىلى قاتتى تۇرمىستىق قالدىقتاردى جيناۋ جۇيەسىن جاڭارتۋ جۇمىستارى جالعاسادى. قالادا 2 مىڭنان استام تەرەڭدەتىلە كومىلگەن كونتەينەر ورناتۋ جوسپارلانعان، بۇل قالانىڭ سانيتارلىق جاعدايىن جاقسارتۋعا سەپتىگىن تيگىزەدى. سونداي-اق ىلە اۋدانىندا قاتتى تۇرمىستىق قالدىقتاردى كومۋگە ارنالعان جاڭا پوليگون جوباسى ازىرلەنۋدە، بۇل بولاشاقتا قالدىقتاردى كادەگە جاراتۋ ماسەلەسىن ءتيىمدى شەشۋگە سەپتىگىن تيگىزەدى.
ۇلكەن الماتى جانە قارعالى وزەندەرىنىڭ ارناسىن قايتا قۇرۋ، سونداي-اق «سايران» سۋ قويماسىن كورىكتەندىرۋ جوبالارى تابيعي ەكوجۇيەلەردى قالپىنا كەلتىرۋگە جانە تۇرعىندارعا ارنالعان جاڭا ەكولوگيالىق تازا دەمالىس ايماقتارىن قۇرۋعا باعىتتالعان.