سەبەبى، ەلدە تۋۋ كورسەتكىشى تومەندەپ كەتكەن.
توكيو بيلىگى قاتتى تومەندەپ كەتكەن تۋۋ كورسەتكىشىن كوتەرۋ ماقساتىندا مەملەكەت قىزمەتكەرلەرىنىڭ بارىنە ءتورت كۇندىك جۇمىس اپتاسىن ەنگىزەدى، دەپ حابارلايدى aqshamnews.kz CNN تەلەارناسىنا سىلتەمە جاساپ.
قالا اكىمدىگىنىڭ اقپاراتىنا ساي، قىزمەتكەرلەرگە اپتاسىنا ءۇش كۇن دەمالۋعا مۇمكىندىك بەرەتىن وزگەرىس ساۋىردە كۇشىنە ەنەدى. بۇعان قوسا باستاۋىش سىنىپتا وقيتىن بالاسى بار اتا-انالارعا جۇمىستان ەرتەرەك بوساۋعا رۇقسات بەرەتىن تاعى ءبىر وزگەرىس جاريالاندى.
"ءبىز جۇمىس ىستەۋ ءتارتىبىن قايتا قارايمىز. ەندى ەشكىم بالا تۋۋ نەمەسە بالا كۇتىمى سەكىلدى ۇيدەگى ماسەلەلەرگە بايلانىستى جۇمىستاعى مانسابىنان باس تارتپايتىن بولادى"، - دەپ مالىمدەدى توكيو گۋبەرناتورى يۋريكو كويكە.
جاپونيادا تۋۋ كورسەتكىشى كوپتەگەن جىلدار بويى تومەندەپ كەتكەن. ۇكىمەتتىڭ جاستارعا وتباسىن قۇرۋعا جاعداي جاساپ جاتقانىنا قاراماستان، تۋۋ كورسەتكىشى جاقسارار ەمەس. بىلتىر وسى ەلدە بار بولعانى 727 277 بالا دۇنيەگە كەلگەن. جاپونيادا ايەلدەردىڭ ورتاشا بالا سانىنا قاتىستى كورسەتكىشى 1،2 عانا بولعان. حالىق سانىن تۇراقتى تۇردە ۇستاپ تۇرۋ ءۇشىن مۇنداي كورسەتكىش كەم دەگەندە 2،1 بولۋى كەرەك. جاپونيا ۇكىمەتى دەموگرافيالىق داعدارىستى ەڭسەرۋ ماقساتىندا ءتۇرلى باعدارلامالار ەنگىزىپ جاتىر. بۇل ەلدە ەر ازاماتتار بالا كۇتۋ ءۇشىن اقىلى دەمالىسقا شىعا الادى. الەۋمەتتانۋشىلاردىڭ كوبى تۋۋ دەڭگەيىنىڭ تومەندەۋىن جاپونياداعى ەڭبەك مادەنيەتى مەن ءومىر ءسۇرۋ قۇنىنىڭ قىمباتتاۋىمەن تۇسىندىرەدى.