بيىل كينوالەم جاعىمدى جاڭالىقتارعا تولى بولماق. جۇرتتىڭ جانارىن جاۋلاعان تۋىندىلاردىڭ تاعى ءبىر ءبولىمى تاسپالانىپ، ۇلكەن ەكرانعا جول تارتپاق. ەندەشە "فيلمدەر جارىلىسى" اتالعان 2025 جىل قانداي كينوفيلمدەر مەن سەريالداردىڭ جارىققا شىعاتىن جىلى بولماق؟ اqshamnews.kz ءتىلشىسى توپتاما جاسادى.
Avatar: Fire and Ash/اۆاتار: وت جانە كۇل
كينودا: 19 جەلتوقساننان باستاپ
رەجيسسەر دجەيمس كەمەروننىڭ مەگا-ساتتى "اۆاتار" ءفيلمىنىڭ فرانشيزاسىنىڭ ءۇشىنشى ءبولىمى "وت جانە كۇل" دەگەن اتاۋمەن ەكراندارعا شىعادى. سەم ۋورتينگتون، زوي سالدانا، كەيت ۋينسلەت، ستيۆەن لەنگ، كليفف كەرتيس جانە سيگۋرني ۋيۆەر فيلمدەگى رولدەرىنە قايتا ورالادى. جاڭا كەيىپكەرلەردى ۋونا چاپلين، ديەۆيد تيۋليس جانە ميشەل يە سومدايدى.
Zootopia 2/ اڭدار شاھارى 2
كينودا: 27 قاراشادان باستاپ
2016 جىلى جارىق كورگەن بۇل ءمۋلتفيلمدى كورمەگەن جان جوق شىعار. "اڭدار شاھارى" ءمۋلتفيلمى ەرەكشە سيۋجەتىمەن جانە ءازىل ارالاس قوعام شىندىعى سۋرەتتەلگەن سەنارييىمەن كوپتىڭ كوڭىلىنەن شىققان بولاتىن. العاشقى ءبولىمى 1 ميلليارد دوللاردان كوپ كاسسا جيناعان بۇل ءمۋلتفيلمنىڭ ەندى ەكىنشى ءبولىمى قاراشا ايىندا ۇلكەن ەكرانعا جول تارتپاق. پوليسەي قويان دجۋدي مەن تۇلكى نيك بۇل جولى قانداي وقيعاعا تاپ بولار ەكەن؟
Wednesday/ ۋەنزدەي (2 ماۋسىم)
6 تامىزدا جارىق كوردى
"ۋەنزدەي" امەريكالىق تەلەحيكاياسىنىڭ ەكىنشى ماۋسىمى ءبىرىنشى ماۋسىمنىڭ پرەمەراسىنان كەيىن كوپ ۇزاماي 2023 جىلدىڭ 6 قاڭتارىندا رەسمي تۇردە جاريالاندى. ءتۇسىرىلىم 2024 جىلى باستالدى. العاشقى ءتورت ءبولىمى 2025 جىلدىڭ 6 تامىزىندا Netflix سايتىندا شىعارىلدى. ەندى جاڭا بولىمدەرى قىركۇيەكتىڭ باسىندا تاعى شىعادى.
Wake Up Dead Man: A Knives Out Mystery/ قىنسىز قانجار: ويان، ءولى ادام
كينودا: 19 جەلتوقساننان باستاپ
بۇل جازۋشى جانە رەجيسسەر رايان دجونسوننىڭ دەتەكتيۆ ءفيلمى. فرانشيزانىڭ ءۇشىنشى ءبولىمى 2025 جىلدىڭ قازان ايىندا فەستيۆالدارعا قاتىسىپ، جەلتوقساندا ۇلكەن ەكرانعا جول تارتپاق. بۇعان دەيىن ءفيلمنىڭ ەكى ءبولىمى كورەرمەننىڭ كوزايىمىنا اينالعان ەدى. 2019 جىلى الەمدىك پروكاتتا 312 ميلليون دوللار جينادى. ءفيلمنىڭ بيۋدجەتى 40 ميلليون دوللار بولدى. وسىلايشا، كارتينا شىعىندارىن تولىق جاپتى جانە پايدا اكەلگەن ەدى.
QAITADAN/اپات تۋرالى تۇڭعىش قازاقستاندىق فيلم
كينودا: 4 قىركۇيەكتەن باستاپ
ءفيلمنىڭ سيۋجەتى قىزىلاعاش اۋىلىنداعى 2010 جىلعى اپاتقا نەگىزدەلگەن. اتاپ ايتقاندا، الگى مەزگىلدە اۋىلداعى سۋ قويماسىنداعى بوگەتتىڭ بۇزىلۋى ناتيجەسىندە اۋىل تۇرعىندارى ومىرگە ءقاۋىپتى جاعدايعا تاپ بولعان. فيلمدە ءجاسوسپىرىم راۋان دەگەن كەيىپكەردىڭ وقيعاسى باياندالادى.
«باقىت قۇشاعىندا» العاشقى ميۋزيكل-فيلم
كينودا: 23 قازاننان باستاپ
"باقىت قۇشاعىندا" - ءشامشى قالداياقوۆتىڭ 95 جىلدىعىنا ارنالعان مۋزىكالىق فيلم-ميۋزيكل. رەجيسسەر ءارى پروديۋسەرى — سانات شاپاشوۆ. كارتينادا داۋرەن سەرعازين، ازامات ساتىبالدى، ايگۇل يمانبايەۆا، ءاليا انۋاربەك سىندى اكتەرلەر ويناپ، كومپوزيتوردىڭ ەڭ سۇيىكتى اندەرى جاڭا تىنىسپەن شىرقالادى. ءفيلمنىڭ ازىرگە رەسمي ترەيلەرى شىققان جوق.
Auru/اۋرۋ
كينودا: 13 قاراشادان باستاپ
قازاقستاننىڭ ەڭ جارقىن جاس رەجيسسەرلەرىنىڭ ءبىرى ايتورە جولداسقالي تاعى ءبىر ەرەكشە تۋندىسىن كورەرمەنگە ۇسىندى. تۇنەككە ۇقساس اتموسفەرادا تۇسىرىلگەن بەينەدە ەر ادام قىزدىڭ شاشىن تاقىرلاپ الىپ، ەكەۋى جالعان ۆيدەو ءتۇسىرىپ، ەمگە اقشا جيناماق بولادى. "قارىزدان قۇتىلامىز دا، بولدى" دەگەن فينالدىق ءسوز كورەرمەندى مورالدىق قاقتىعىسى تەرەڭ وقيعا كۇتىپ تۇرعانىن اڭعارتادى. باستى رولدە – قازاقستاندىق تانىمال اكتەر ايان وتەپبەرگەن.