ميللياردەر «لابۋبۋ»

«لابۋبۋ» ويىنشىعى Pop Mart-قا ميللياردتاعان تابىس اكەلدى.

قىتايدىڭ Pop Mart كومپانياسى 2025 جىلدىڭ العاشقى جارتىسىندا تابىسىن 350%-دان استامعا ارتتىردى. بۇعان باستى سەبەپ — «لابۋبۋ» دەپ اتالاتىن كىشكەنتاي ويىنشىق كەيىپكەر.

«لابۋبۋ» — گونكونگ سۋرەتشىسى Kasing Lung ويلاپ تاپقان «The Monster Trilogy» كىتابىنىڭ كەيىپكەرى. 2019 جىلدان بەرى Pop Mart بۇل ويىنشىقتىڭ جۇزدەگەن نۇسقاسىن شىعاردى: ءتۇرلى ءتۇستى ءجۇن، ءارتۇرلى ەموسيا، ءتۇرلى اشەكەيلەر. ەڭ تانىمالدارىنىڭ ءبىرى — لابۋبۋ-ىلگەك ويىنشىق، ونى رياننا مەن BLACKPINK توبىنىڭ ءانشىسى ليسا تاعىپ جۇرگەن.

بۇل ويىنشىقتار «سوقىر قوراپ» (mánghé) فورماتىندا ساتىلادى: ساتىپ الۋشى قانداي ۇلگى تۇسەرىن الدىن الا بىلمەيدى. باعاسى — 20–30 دوللار، ال سيرەك كەزدەسەتىندەرى قايتا ساتىلىمدا مىڭداعان دوللارعا وتەدى.

ءقازىر Pop Mart-تىڭ نارىقتىق قۇنى $40 ملرد-قا جەتىپ، الەمدەگى ءىرى ويىنشىق وندىرۋشىلەر — Hasbro ($10،6 ملرد) مەن Mattel ($6،4 ملرد) كومپانيالارىنىڭ جيىنتىق باعاسىنان دا اسىپ ءتۇستى. ال نەگىزىن قالاۋشى ۆان ءنيننىڭ بايلىعى $20 ملرد-تان جوعارى، ول قىتايدىڭ ەڭ باي 10 كاسىپكەرىنىڭ قاتارىنا كىردى.

Pop Mart-تىڭ تابىسى جوعارى تەحنولوگيالار مەن جاساندى ينتەللەكتكە بايلانىستى ەمەس. دەگەنمەن، دۇرىس ماركەتينگ، كوللەكسيا مادەنيەتى جانە جانكۇيەرلەردىڭ قىزىعۋشىلىعى قاراپايىم ويىنشىقتى ميللياردتاعان دوللارلىق بيزنەسكە اينالدىردى.