الماتى قالاسىنداعى №196 جالپى ءبىلىم بەرەتىن مەكتەپتە 13–23 قازان ارالىعىندا رەسپۋبليكا كۇنىنە ارنالعان پاتريوتتىق جانە مادەني ءىس-شارالار لەگى ءوتىپ جاتىر، - دەپ حابارلايدى Aqshamnews.kz.
مەرەكەنىڭ باستى ماقساتى – وقۋشىلاردىڭ بويىندا وتانسۇيگىشتىك سەزىمدى، ازاماتتىق جاۋاپكەرشىلىك پەن ەل تاعدىرىنا بەيجاي قاراماۋ قاسيەتتەرىن قالىپتاستىرۋ بولدى.
ءىس-شارالار اياسىندا 1–11 سىنىپ وقۋشىلارىنا تاۋەلسىزدىك پەن ەگەمەندىك تاقىرىبىنداعى اشىق ساباقتار ۇيىمداستىرىلدى. 4-سىنىپ وقۋشىلارىنىڭ «مەنىڭ ەلىم – مەنىڭ وتباسىم» اتتى سۋرەت كورمەسى كورەرمەندەردىڭ كوڭىلىنەن شىعىپ، جاس قىلقالام شەبەرلەرىنىڭ ەلگە دەگەن سۇيىسپەنشىلىگىن ايقىندادى. 5-سىنىپ وقۋشىلارىنىڭ «قىران ەلىم – قازاقستانىم!» فلەشموبى مەن جوعارى سىنىپ وقۋشىلارىنىڭ «قازاقستان بولاشاعى» اتتى ەسسە بايقاۋى مەكتەپتىڭ مەرەكەلىك رۋحىن ودان ءارى ارتتىرا ءتۇستى. ۇزدىك شىعارمالار اۆتورلارى ماراپاتتالىپ، جۇمىستار الەۋمەتتىك جەلىلەردە جاريالاندى.
وقۋشىلار تەك مەكتەپ قابىرعاسىندا عانا ەمەس، قوعاممەن دە بايلانىس ورناتتى. 7-سىنىپ وقۋشىلارى اۋدان ارداگەرلەرىنە ارنايى بارىپ، ونەرلەرىن كورسەتتى، جىلى لەبىزدەرىن ءبىلدىرىپ، قاريالاردىڭ باتاسىن الدى. ال 10-سىنىپتار «ءدامدى قازاقستان» ۇلتتىق تاعامدار فەستيۆالى اياسىندا ءتۇرلى ۇلتتاردىڭ اس ءمازىرىن تانىستىرىپ، ەل بىرلىگىنىڭ ءدامىن ۇسىندى. سونىمەن قاتار، مەكتەپىشىلىك سپورتتىق جارىستار مەن ۇستازداردىڭ «مەنىڭ ەلىم وسىنداي!» انىمەن شىرقاعان حورى مەرەكەنىڭ اجارىن اشتى.
رەسپۋبليكا كۇنىنە ارنالعان بارلىق ءىس-شارالار وقۋشىلاردىڭ ۇلتتىق سانا-سەزىمىن نىعايتىپ، ەلگە دەگەن سۇيىسپەنشىلىگىن ارتتىرۋعا باعىتتالدى. مەكتەپ ۇجىمى مەن وقۋشىلارى ۇيىمداستىرعان مەرەكەلىك شارالار ەل بىرلىگىنىڭ، تاتۋلىق پەن ءپاتريوتيزمنىڭ جارقىن كورىنىسىنە اينالدى.