الماتى قالاسىندا جەرگىلىكتى تۇرعىن جاڭا ەنگىزىلگەن ق ر قىلمىستىق كودەكسىنىڭ 232-1-بابى بويىنشا قىلمىستىق جاۋاپكەرشىلىككە تارتىلدى.
اتالعان باپ ءوز بانك نەمەسە تىركەۋ دەرەكتەرىن قۇقىققا قارسى ماقساتتاردا پايدالانۋعا بەرۋگە تىيىم سالادى، - دەپ حابارلايدى Aqshamnews.kz.
ەسكە سالا كەتەيىك، "دروپپەرلەر" دەپ اتالاتىن تۇلعالارعا قاتىستى قىلمىستىق جاۋاپكەرشىلىك 2025 جىلعى 16 قىركۇيەكتەن باستاپ ەنگىزىلگەن. جاڭا نورما الاياقتاردىڭ ۇرلانعان اقشانى قولما-قول اقشاعا اينالدىرۋىنا نەمەسە باسقا شوتتارعا اۋدارۋىنا مۇمكىندىك بەرەتىن قارجىلىق دەلدالداردىڭ ارەكەتىنە توسقاۋىل قويۋدى كوزدەيدى. تەرگەۋ بارىسىندا جەكە كاسىپكەر ءوز تىركەۋ دەرەكتەرى مەن QR-كودىن بەلگىسىز ادامدارعا بەرگەنى انىقتالدى. وسى دەرەكتەر ارقىلى الاياقتىق بەلگىلەرى بار كۇماندى اقشا اۋدارىمدارى جۇزەگە اسىرىلعان. جەدەل-ىزدەستىرۋ ءىس-شارالارىنىڭ ناتيجەسىندە ايەل ۇستالىپ، ۋاقىتشا ۇستاۋ يزولياتورىنا قامالدى.
-بۇل – زاڭسىز قارجىلىق وپەراسيالار ءۇشىن بانكتىك دەرەكتەرىن پايدالانۋعا بەرگەن جەكە ادامنىڭ قىلمىستىق جاۋاپكەرشىلىككە تارتىلىپ، قاماۋعا الىنعان ەلىمىزدەگى العاشقى وقيعا. جاڭا نورما بۇعان دەيىن جاۋاپكەرشىلىكتەن تىس قالىپ كەلگەن قارجىلىق الاياقتىق تىزبەگىن ءتيىمدى تۇردە توقتاتۋعا مۇمكىندىك بەرەدى. پوليسيا وسىنداي قۇقىق بۇزۋشىلىقتاردىڭ الدىن الۋ باعىتىنداعى جۇمىستاردى قاتاڭ تۇردە جالعاستىرادى، – دەدى الاتاۋ اۋداندىق پوليسيا باسقارماسى باستىعىنىڭ مىندەتىن اتقارۋشى تيمۋر مۋلينوۆ.
الماتى قالالىق پوليسيا دەپارتامەنتى ازاماتتارعا وزدەرىنىڭ بانك جانە تىركەۋ دەرەكتەرىن بوگدە ادامدارعا بەرمەۋدى ەسكەرتەدى. مۇنداي ارەكەت، شوت يەسى پايدا تاپپاعان جاعدايدىڭ وزىندە، قىلمىسقا قاتىستىلىق رەتىندە قاراستىرىلۋى مۇمكىن.