قىتايلىق ايەل 13 جىلدان بەرى دۇكەنىنىڭ جارىعىن سوندىرمەي كەلەدى. ول بۇل ارەكەتىن ايەلدەردىڭ قاۋىپسىزدىگىن ويلاعانى ءۇشىن جاساعان، - دەپ حابارلايدى اqshamnews.kz ءتىلشىسى SCMP-كە سىلتەمە جاساپ.
قىتايدىڭ ورتالىعىنداعى حۋنان پروۆينسياسى، چانشا قالاسىنىڭ 60 جاستاعى تۇرعىنى سۋن مەيحۋا 13 جىلدان بەرى تۇندە دۇكەنىنىڭ جارىعىن سوندىرمەگەن. ول بۇل ارەكەتتى 2012 جىلى دۇكەن اشقان ساتتەن باستاپ ادەتكە اينالدىرعان.
سۋننىڭ ايتۋىنشا، بىردە بىرنەشە جاس قىز وعان كەلىپ، دۇكەن ماڭىنداعى جارىقتىڭ ۇيگە جۇمىستان قايتىپ بارا جاتقاندا ءقاۋىپسىز سەزىنۋگە كومەكتەسەتىنىن ايتقان. سول ساتتەن باستاپ ول سىرتقى جارىقتى بىردە-بىر رەت سوندىرمەگەن.
جارىقپەن بىرگە جۇمىس ۋاقىتى دا ۇزارتىلعان. ءقازىر دۇكەن تۇنگى ەكىگە دەيىن اشىق. كەيدە كەشكى ۋاقىتتا جالعىز جۇرۋگە قورقاتىن قىزداردى سۋن ۇيىنە دەيىن دە شىعارىپ سالادى.
تۇرعىندار ونى "جارىق تاتە" دەپ اتاپ كەتكەن. بۇل - ونىڭ اينالاسىنداعىلارعا دەگەن مەيىرىمى مەن قامقورلىعىنا بايلانىستى قويىلعان لاقاپ.
سۋن ءتىپتى ۇيىندەگى ستاسيونارلىق تەلەفوندى دۇكەنگە كوشىرىپ قويعان. ونىمەن قارت كىسىلەر مەن بالالار تەگىن حابارلاسا الادى، سەبەبى كەيبىرى ۇيالى تەلەفون ۇستامايدى نەمەسە پايدالانا المايدى. جىل سايىن توزعان تەلەفونىن سۋن جاڭالاپ وتىرادى.
"قىزمەتتى توقتاتۋ تۋرالى ەشقاشان ويلاعان ەمەسپىن. مەن تەك كومەكتەسكىم كەلەدى"، – دەيدى ول.
بۇعان قوسا، قالا تۇرعىندارى وعان ءۇي كىلتتەرىنىڭ قوسالقى كوشىرمەسىن سەنىپ تاپسىرادى. سۋن ولاردى مۇقيات ساقتايدى جانە قاجەت بولعاندا كومەككە كەلەدى.
"كومەك كەرەك بولسا، مەن بىردەن مەيحۋاعا بارامىن. مەن وعان سەنەمىن"، – دەيدى كورشى اجەي.
سۋن مەن ونىڭ كۇيەۋى بۇل اۋداندا 20 جىلدان اسا ۋاقىتتان بەرى تۇرادى. بۇرىن ولار مەملەكەتتەن جاردەماقى الىپ كەلگەن. ايەلدىڭ ايتۋىنشا، ول كەزدە جەرگىلىكتى قاۋىمداستىقتان كوپ كومەك العان. ءقازىر ول وسى قامقورلىقتىڭ وتەۋىن قايتارعىسى كەلەدى.
سۋن مەيحۋانىڭ بۇل وقيعاسى جەلىدە كەڭ تارالىپ، جۇرتتىڭ جۇرەگىن ەلجىرەتتى. الەۋمەتتىك جەلى قولدانۋشىلارى ونىڭ تاباندىلىعىن جانە كومەكتەسۋگە دەگەن شىنايى نيەتىن ەرەكشە اتاپ وتكەن.