بىرلىك پەن دوستىق – قازاقستاننىڭ باستى بايلىعى

قازاقستان حالقى اسسامبلەياسىنا – 30 جىل

قازاقستان – كوپەتنوستى ەلدەردىڭ ىشىندەگى ەڭ بىرەگەي مەملەكەتتەردىڭ ءبىرى. بۇل جەردە جۇزدەن اسا ۇلت پەن ۇلىس ءبىر شاڭىراق استىندا ءتاتۋ-تاتتى ءومىر ءسۇرىپ كەلەدى. ءبىز ءۇشىن حالىقتار دوستىعى، ءوزارا قۇرمەت پەن بەيبىت قاتار ءومىر ءسۇرۋ – جاي ۇران ەمەس، كۇندەلىكتى ءومىر سالتىمىزدىڭ نەگىزى.

ەلىمىزدەگى كۇرد حالقى دا وسى ورتاق ءۇيدىڭ ءبىر بولشەگى. ءبىزدىڭ قاۋىمداستىق – «باربانگ» – قازاقستان تاۋەلسىزدىگىن جاريالاعان العاشقى جىلدارى قۇرىلىپ، ەل ىشىندەگى تۇراقتىلىقتى، ۇلتارالىق تاتۋلىقتى ساقتاۋعا بەلسەنە اتسالىسىپ كەلەدى. ءبىز قازاق حالقىنا ءاردايىم العىسىمىزدى بىلدىرەمىز – كەڭ قۇشاعىن اشىپ، تاعدىر تالكەگىمەن كەلگەن وزگە ۇلتتاردى باۋىرىنا باستى، ءبىر ءۇزىم نانىن ءبولىسىپ، بەيبىت ءومىر سىيلادى.

حالىقتار اراسىنداعى بىرلىك – بۇل مەملەكەتتىڭ ىشكى تۇراقتىلىعى مەن دامۋىنىڭ كەپىلى. ءبىز مۇنى اسىرەسە قازىرگى كۇردەلى گەوساياسي جاعدايدا تەرەڭ سەزىنىپ وتىرمىز. قازاقستان حالقى اسسامبلەياسى – بىرلىك پەن دوستىقتىڭ ناقتى كەپىلىنە اينالعان بىرەگەي ينستيتۋت. ول مادەني ارتۇرلىلىكتى ساقتاۋ مەن ازاماتتىق بىرەگەيلىكتى نىعايتۋدا ماڭىزدى ءرول اتقارىپ كەلەدى.

تاريح بىزگە ءبىر نارسەنى ۇيرەتتى: ۇلتتىڭ ۇلىلىعىن ونىڭ سانى ەمەس، بەرەكەسى مەن بىرلىگى انىقتايدى. سول سەبەپتى ءبىز – كۇردتەر، قازاق ەلىمەن تاعدىرلاس، ءبىر حالىق رەتىندە، بەيبىتشىلىك پەن كەلىسىمدى ساقتاۋ جولىندا ەڭبەك ەتۋدى قاسيەتتى مىندەتىمىز دەپ بىلەمىز. ءوز مادەنيەتىمىزدى ساقتاي وتىرىپ، قازاق مادەنيەتىن دە قۇرمەتتەيمىز، مەملەكەتتىك ءتىلدى مەڭگەرۋدى – ازاماتتىق پارىزىمىز دەپ سانايمىز.

بىرلىك بار جەردە بەرەكە بار. قوعام تىنىشتىعى – ءار ازاماتتىڭ اماندىعى، بولاشاقتىڭ كەپىلى. ال دوستىق – سول بىرلىكتىڭ دىڭگەگى.

ءبىز – ءارتۇرلى ۇلت وكىلدەرى، ءبىراق ءبىر وتانىمىز بار – ول قازاقستان. ءبىزدى بىرىكتىرەتىن – ورتاق تاعدىر، ورتاق بولاشاق، ورتاق قۇندىلىقتار. وسى قۇندىلىقتاردى ساقتاۋ – ءبارىمىزدىڭ بورىشىمىز.

حالىقتار اراسىنداعى دوستىقتى نىعايتۋ – بۇگىنگى كۇننىڭ عانا ەمەس، كەلەر ۇرپاق الدىنداعى دا جاۋاپكەرشىلىك. وسى جاۋاپكەرشىلىكتى ادال اتقارۋ – ءار ازاماتتىڭ مىندەتى دەپ ەسەپتەيمىن.