الماتى قۇرىلىس-تەحنيكالىق كوللەدجىنىڭ بازاسىندا EuroSkills Herning 2025 حالىقارالىق چەمپيوناتىنا WorldSkills قۇزىرەتتەرى بويىنشا قازاقستاننىڭ ۇلتتىق قۇراماسىنا ارنالعان پسيحولوگيالىق دايىندىق جۇمىستارى وتكىزىلىپ جاتىر، دەپ حابارلايدى اqshamnews.kz ءتىلشىسى.
ءىس-شاراعا ۇلتتىق قۇرامانىڭ 50 وكىلى قاتىسىپ، ءبىر بولىگى ەۋروپانىڭ ەڭ بەدەلدى كاسىبي چەمپيوناتتارىنىڭ ءبىرى – EuroSkills Herning 2025 بايقاۋىندا ەل نامىسىن قورعايتىن بولادى.
پسيحولوگيالىق دايىندىقتى جۋىردا يۋنەسكو كلۋبتارىنىڭ ۇلتتىق فەدەراسياسىنىڭ رەسمي كلۋبى مارتەبەسىن العان «جاڭا ۇرپاق» ءبىلىم بەرۋ قوزعالىسى ۇيىمداستىرۋدا. جوبا 10 جىل ىشىندە قازاقستان مەن وزگە ەلدەردىڭ 17 000-نان استام جاسىن قامتىپ، ولاردىڭ كوشباسشىلىق، كوممۋنيكاتيۆتىك جانە كوماندالىق داعدىلارىن دامىتۋعا ۇلەس قوستى.
«باعدارلامانىڭ ماقساتى – قاتىسۋشىلاردىڭ توزىمدىلىگىن ارتتىرۋ، ءوزىن-وزى رەتتەۋ، كوماندالىق ءوزارا ارەكەتتەسۋ جانە حالىقارالىق جارىستاردا سەنىمدىلىك داعدىلارىن دامىتۋ. شارا اياسىندا سەرتيفيكاتتالعان جاتتىقتىرۋشىلار مەن پسيحولوگتاردىڭ قاتىسۋىمەن شەبەرلىك ساباقتارى، توپتىق ترەنينگتەر جانە جەكە سەسسيالار وتكىزىلەدى. بۇل پسيحولوگيالىق دايىندىق ارقىلى قاتىسۋشىلاردىڭ بىر-بىرىمەن بايلانىسى نىعايا تۇسپەك»، – دەدى «تالاپ» ۇاو Worldskills قوزعالىسىن دامىتۋ ءبولىمىنىڭ باسشىسى لاۋرا بولاتبەك قىزى.
ايتا كەتەيىك، 2025 جىل قازاقستاندا «جۇمىسشى ماماندىقتار جىلى» دەپ جاريالانعان ەدى. دەمەك، اتالمىش دايىندىقتىڭ دا ماقساتى – جاستار اراسىنداعى جۇمىسشى ماماندىقتاردىڭ بەدەلىن ارتتىرۋ جانە ولاردى كەڭىنەن ناسيحاتتاۋ. EuroSkills – ەۋروپاداعى ەڭ ءىرى جۇمىسشى كاسىپتەر چەمپيوناتى. ول ەكى جىلدا ءبىر رەت وتكىزىلىپ، 25 جاسقا دەيىنگى جاس مامانداردى بىرىكتىرەدى. جارىس ونەركاسىپتىك وندىرىستەن باستاپ قىزمەت كورسەتۋ سالاسىنا دەيىن 40-تان استام قۇزىرەتتىلىكتى قامتيدى. بيىل 30-دان استام ەلدىڭ قاتىسۋشىلارىنىڭ باسىن بىرىكتىرەتىن چەمپيونات دانيانىڭ حەرنينگ قالاسىندا وتەدى.
"باعدارىم – قوناق ءۇي شارۋاشىلىعى قۇزىرەتتىلىگى. قىركۇيەك ايىندا بولاتىن چەمپيوناتقا دايىندىعىمىز كەرەمەت. شىنى كەرەك، باسىندا نەمقۇرايلى قارادىم. جاتتىقتىرۋشىممەن تانىس بولعانىممەن، دايىندىقتىڭ جوعارى دەڭگەيدە بولاتىنىنا باستاپقىدا سەنبەپ ەدىم. ماسەلەن، بىزدە جاقىندا عانا 6 ساعاتتىق تاجىريبە بولدى، ءبىراق ونى 4 ساعاتتا بىتىردىك. سپورت زالدىڭ ورتاسىنان ەكى ءجىپ تارتىلىپ، ءبارىمىز ءجىپتىڭ بەرگى جاعىندا تۇردىق. باستى شارت – 50 ادامنىڭ سول جىپكە تيمەي، ورتاسىنان ءوتۋى. الداعى ءتۋرنيردىڭ ماقساتى جۇمىسشى ماماندىقتاردىڭ ماڭىزدىلىعىن كورسەتۋ دەپ سانايمىن. بۇل – مەنىڭ حالىقارالىق ارەناداعى ەكىنشى جارىسىم. 2024 جىلى فرانسيادا وتكەن جارىستا ونەر كورسەتكەن ەدىم" دەيدى قاتىسۋشى جانەل ساعىندىق.