بۇگىن ق ر دەنساۋلىق ساقتاۋ مينيسترلىگىندە القا وتىرىسى باستالار الدىندا استانادا قىزمەتتىك مىندەتىن اتقارۋ كەزىندە قازا تاپقان 23 جاستاعى جەدەل جاردەم فەلدشەرى ۇلدانا مىرزۋاننىڭ رۋحىنا ءبىر مينۋت ۇنسىزدىك جاريالاندى، - دەپ حابارلايدى اqshamnews.kz ءتىلشىسى مينيسترلىككە سىلتەمە جاساپ.
ۆەدومستۆو مالىمەتىنشە، بۇكىل ەل بويىنشا 100 مىڭنان استام مەديسينالىق قىزمەتكەر جۇمىس ورىندارىندا ارىپتەسىن ەسكە الىپ، قۇرمەت كورسەتتى.
"ەلىمىز بويىنشا 100 مىڭنان استام مەديسينا قىزمەتكەرى ءوز جۇمىس ورىندارىندا ارىپتەسىنىڭ جارقىن بەينەسىن ەسكە الىپ، قۇرمەت كورسەتتى. ول شۇعىل جاعدايدا ادامداردىڭ ءومىرىن قۇتقارۋ ءۇشىن ءوز ءومىرىن قيعان بولاتىن"- دەلىنگەن حابارلامادا.
ۇلدانا مىرزۋان قايتىس بولعاننان كەيىن جوعارى مەملەكەتتىك ناگراداعا ۇسىنىلدى. مەملەكەت باسشىسىنىڭ جارلىعىمەن ول قىزمەتتىك بورىشىن ۇلگىلى اتقارعانى، توتەنشە جاعدايدا كورسەتكەن ەرلىگى مەن جانقيارلىعى ءۇشىن «ەرلىگى ءۇشىن» مەدالىمەن ماراپاتتالدى.
ەسكە سالايىق، 8 قاراشادا استانادا تاۋەلسىزدىك داڭعىلىنداعى عيماراتتىڭ كىرپىش قاپتاماسىنىڭ ءبىر بولىگى كونديسيونەرمەن بىرگە قۇلاپ، بەس ادام زارداپ شەككەن. ولاردىڭ قاتارىندا وقيعا ورنىنا العاشقى كومەك كورسەتۋ ءۇشىن كەلگەن جەدەل جاردەم فەلدشەرى ۇلدانا مىرزۋان دا بولدى. ول زارداپ شەككەندەرگە كومەكتەسىپ جاتقان ساتتە ەكىنشى قاباتتان قۇلاعان كونديسيونەر ونىڭ ۇستىنە تۇسكەن.
دارىگەرلەر 8 قاراشادان باستاپ ونىڭ ءومىرى ءۇشىن كۇرەستى، الايدا العان جاراقاتتارى سالدارىنان اۋرۋحانادا كوز جۇمدى. دەنساۋلىق ساقتاۋ ءمينيسترى اقمارال ءالنازاروۆا مارقۇمنىڭ تۋىستارىنا كوڭىل ايتىپ، ۇلدانانىڭ سوڭعى ساتىنە دەيىن ادامداردى قۇتقارۋعا تىرىسقانىن اتاپ ءوتتى.