استاناداعى جەكە ستوماتولوگيا كلينيكاسىندا 3 جاستاعى قىزدىڭ ولىمىنە قاتىستى سوت پروسەسى جالعاسىپ جاتىر. مارقۇمنىڭ اكەسى سوتتا سويلەپ، دارىگەرلەردىڭ قىزدىڭ 18 ءتىسىن ءبىر سەانستا ەمدەۋگە شەشىم قابىلداعانىن مالىمدەدى، دەپ حابارلايدى اqshamnews.kz ءتىلشىسى.
قايعىلى وقيعا 2024 جىلعى 30 قازاندا بولعان. اكەسى تالعات قۇماروۆتىڭ ايتۋىنشا، قىزى 3،5 ساعاتقا سوزىلعان ناركوزدان كەيىن ويانباعان. پروسەدۋرا باستاپقىدا ءۇش ساعاتقا جوسپارلانعان.
«مەن دارىگەردەن 18 ءتىستى بىردەن ەمەس، الدىمەن توعىزىن، قالعانىن كەيىن ەمدەۋگە بولا ما دەپ سۇرادىم. ءبىراق بىزگە ءبارىن بىردەن جاساۋ كەرەك دەدى. سەداسيا بالا اۋرۋحانادان شىققاننان جەتى اي وتكەن سوڭ جاسالدى. ەگەر جاقىندا، بىر-ەكى اي بۇرىن بولسا، مۇنداي ۇزاق ناركوزعا كەلىسىم بەرمەس ەدىك»، – دەدى ول.
قىزدىڭ وكپەسى پنيەۆمونيادان كەيىن تولىق جازىلماعانى انىقتالعان. مەديسينالىق جانە فارماسيەۆتيكالىق باقىلاۋ كوميتەتىنىڭ ساراپتاماسى كلينيكانىڭ بالانىڭ جاعدايىن دۇرىس باعالاماعانىن كورسەتكەن.
ءىس بويىنشا باستى ايىپتالۋشى Dent Park Ohno كلينيكاسىنىڭ انەستەزيولوگى - ايدا جۇماعالييەۆا. ال ستوماتولوگ سوتقا قاتىسپاعان. تەرگەۋ قك-نىڭ 317-بابى 3-بولىگى («مەديسينالىق قىزمەتكەردىڭ كاسىبي مىندەتىن تيىسىنشە ورىنداماۋى، ادام ولىمىنە اكەلۋى») بويىنشا جۇرگىزىلىپ جاتىر.
ايىپتالۋشىعا ءتورت جىلعا دەيىن باس بوستاندىعىن شەكتەۋ نەمەسە ايىرۋ، سونداي-اق ءۇش جىلعا بەلگىلى لاۋازىمداردى اتقارۋعا تىيىم سالۋ جازاسى قاراستىرىلعان.
25 قاراشادا پروكۋرور ساراپتاما قورىتىندىلارىن وقىپ، قۇجاتتاردان بىرنەشە زاڭبۇزۋشىلىق انىقتالعانىن مالىمدەدى. اتاپ ايتقاندا، ستوماتولوگيالىق كارتانىڭ بولماۋى، كەلىسىمنىڭ دۇرىس راسىمدەلمەۋى، كونسۋلتاسيا جازبالارىنىڭ جوعى، ۆيدەوماتەريالدارداعى سايكەسسىزدىكتەر، دياگنوزداردىڭ ناقتى قويىلماۋى جانە كەيبىر قولدانىلعان پرەپاراتتاردىڭ تىركەلمەۋى كورسەتىلگەن.