الماتىداعى №202 مەكتەپ-گيمنازياسىنىڭ باستاۋىش سىنىپ وقۋشىلارى قاريالارعا دەگەن قۇرمەت تەك ءبىر كۇنمەن شەكتەلمەيتىنىن كورسەتىپ، ۇلكەندەرگە ءىلتيپات پەن قامقورلىق كۇن سايىن جاسالۋى ءتيىس ەكەنىن ناقتى ىستەرىمەن دالەلدەدى. ولار ۇيىمداستىرعان جۇرەككە جىلى كەش قوناقتاردىڭ كوڭىلىنەن شىعىپ، ۇرپاقتار ساباقتاستىعىن تاعى ءبىر مارتە دالەلدەدى.
قوعامنىڭ التىن دىڭگەگى – قاريالار. ۇرپاققا ۇلگى، ءومىر جولىنىڭ شەجىرەسى سانالاتىن قارتتارىمىزعا دەگەن قۇرمەت - ۇلتتىق تاربيەنىڭ وزەگى. وسى ۇستانىمدى تۋ ەتكەن الماتى قالاسى اۋەزوۆ اۋدانىنداعى №202 مەكتەپ-گيمنازيانىڭ 3 "ءا" جانە 3 "گ" سىنىپ وقۋشىلارى «قارتى بار ءۇيدىڭ قازىناسى بار» اتتى اسەرلى دە مازمۇندى مەرەكەلىك شارا وتكىزدى.
مەكتەپ اكىمشىلىگى، ۇستازدار، اتا-انالار جانە وقۋشىلار قاتىسقان بۇل كەشتىڭ باستى قوناقتارى – اياۋلى اتا-اجەلەر بولدى. بالالار ولار ءۇشىن جۇرەكجاردى ولەڭدەر وقىپ، اسەم اندەر شىرقادى، بي بيلەپ، ساحنالىق كورىنىس قويىپ، ءوز ونەرلەرىن ورتاعا سالدى.
وقۋشىلاردىڭ ءار قويىلىمىنان ۇلكەندەرگە دەگەن شىنايى سۇيىسپەنشىلىك پەن ءىلتيپات سەزىلدى. ولار ءسوز ونەرى مەن ءان-جىر ارقىلى قارتتاردىڭ ورنىن ەشكىم باسا المايتىنىن، سول سەبەپتى ولارعا دەگەن قۇرمەت تەك قارتتار كۇنىمەن شەكتەلمەۋى كەرەكتىگىن ۇعىندىردى. «قارتتارىن قادىرلەگەن ەل – ۇرپاعىنىڭ بولاشاعىن ويلاعان ەل» دەگەن ويدى جاس جەتكىنشەكتەر اسەرلى جەتكىزە ءبىلدى.
شارا سوڭىندا كەش قوناقتارىنا بالالاردىڭ قولىمەن دايىندالعان شاعىن سىيلىقتار تابىستالىپ، قاريالار اق باتاسىن بەردى. بۇل كەش – قۇرمەت پەن تاربيەنىڭ ۇيلەسكەن كورىنىسى عانا ەمەس، بالالاردىڭ جۇرەگىنە ىزگىلىك ءدانىن ەككەن تاعىلىمدى تاربيە ساباعىنا اينالدى.