Apat aımaqtarynda 3 myńnan astam qutqarýshy jumysty jalǵastyryp jatyr
Kahramanmarashta bastalǵan joıqyn jer silkinisinen 47 975 adam qaza tapty. Bul týraly Túrkıanyń Tótenshe jaǵdaılar basqarmasynyń (AFAD) basshysy Iýnýs Sezer málimdedi, dep habarlaıdy Almaty-akshamy.kz QazAqparatqa silteme jasap.
Iý. Sezerdiń aıtýynsha, qazirgi ýaqytta Túrkıa azamattary, sondaı-aq kórshiles elderdiń, ásirese Sırıada jer silkinisi qurbandarynyń jalpy sany 47 975 adam boldy. Onyń 6 278-i – sheteldik, negizinen Sırıa azamattary.
AFAD basshysy apat aımaqtarynda 3 myńnan astam qutqarýshy qalyp, jumysty jalǵastyryp jatqanyn aıtty.
«Aımaqta jerasty dúmpýleri áli de jalǵasyp jatyr. Sondyqtan, biz qutqarýshylar jasaqtaryn daıyn ustaımyz. Basqa elderden taǵy 300-ge jýyq qutqarýshy da sol jerde qalady», - dedi Iý. Sezer.
6 aqpanda Túrkıada epısentri Kahramanmarashta bolǵan, magnıtýdasy 7 baldan asatyn eki zilzala tirkeldi. Júzdegen aftershokqa ulasqan jerasty dúmpýi eldiń 10 provınsıasy men kórshiles elderde, onyń ishinde Sırıada sezilgen.
Úıindilerdiń astynan izdeý jumystaryna 88 eldiń 11 myń qutqarýshysy qatysty, olardyń qatarynda qazaqstandyqtar da boldy.
Túrkıaǵa zilzaladan kelgen shyǵyn $100 mlrd asýy múmkin. Bul týraly Túrkıadaǵy BUU Damý baǵdarlamalarynyń ókili Lýıza Vınton habarlady.
Mamandardyń aıtýynsha, óńirde áli jarty jyl boıy aftershoktar qaıtalanady. Túrkıadaǵy joıqyn zilzalany boljaǵan nıderlandylyq zertteýshi Frank Hýgerbıts naýryzdyń basynda jańa apattardyń bolýy múmkin ekenin eskertti.
7 naýryzda Hataı, Kahramanmarash jáne Kaıserı provınsıalarynda úsh jer silkinisi tirkeldi.