Almatydaǵy Ábilhan Qasteev atyndaǵy QR Memlekettik óner mýzeıinde belgili zerger Serikqalı Kókenovtyń «Jańǵyrtý» atty jeke kórmesi ashyldy.
«Serikqalı Kókenov — kóne ádis-tásilderdi qaıta jańǵyrtyp zamanaýı dem berýshi sheber. Onyń qoldanysynda Qazaqstanda b.d. deıingi İV-III ǵasyrlarmen belgilengen búrtikteý jáne sirkeleý kóne ádisteri basym. Ortalyq jáne Batys Qazaqstan óńirlerinde qondanylatyn, óte eptilikti qajet etetin bul ádisterdiń zamanaýı jańǵyryǵy zergerdiń negizgi qarýy. Zerger týyndylarynda elimizdiń aýmaǵynda óńdeletin asyl tastardy qoldaný arqyly taqyryptyq buıymdar jasaýda izdenisi sarqylmaǵan. Paıdalanatyn materıaldarǵa marjan, jaqut, kógildir asyl tastar, taý krıstaldary jáne t.b. baǵaly tastar kiredi», — deıdi kórme jetekshisi, mýzeıdiń «Qazaqstan sándik-qoldanbaly óneri» bóliminiń ǵylymı qyzmetkeri Aqjigit Núsip.
Kórme zergerdiń shyǵarmashylyǵynyń keıingi kezeńindegi jumystarynan quralǵan. Ekpozısıada 150-den astam zergerlik buıym, 6 panno jáne 10 músindik týyndylary tanystyryldy. Biraz bóligi jıyntyqty búrtikteý jáne sirkeleý ádisterimen ornyndalǵan dástúrli áshekeı buıymdardan turady. Al qalǵan jumystary kórikti jerlerdi sıpattaý, ulttyq qundylyqtardy baıandaý jáne túrli taqyryptarda oryndalǵan. Ár buıymnyń jasalý ádis-tásilderi uqsas bolǵanymen, pishinderi men taqyryptyq maǵynalary bólek. Áshekeılerdiń birneshe túrlerin ushtastyrý arqyly izdenistik shyǵarmalary da kezdesedi. Náziktik pen tereń taqyryptyq izdenisterdi kórmeden birden ańǵarasyzdar.
Erekshe týyndylar mýzeı tórinde qazan aıynyń 2-ne deıin turady.