İshki ister mınıstrligi "Qarasora-2025" respýblıkalyq operasıasynyń nátıjesin shyǵardy.
Ol esirtkiniń zańsyz aınalymyna qarsy baǵyttalǵan. Oǵan maýsym - qazan aılary aralyǵynda polısıa, İshki ister mınıstrligi Ulttyq ulanynyń jáne Qorǵanyc mınıstrliginiń qyzmetkerleri qatysty, - dep habarlaıdy Aqshamnews.kz Polisia.kz-ke silteme jasap.
Tikushaqtar, drondar jáne spýtnık koordınatalary jumyldyryldy. Jalpy: - 3,5 myń esirtki quqyq buzýshylyǵy anyqtaldy, - 27 tonnadan astam esirtki tárkilendi, - quramynda esirtkisi bar ósimdikterdiń 110 myńnan astam butalary joıyldy, - 4 uıymdasqan qylmystyq top, onyń ishinde bir transulttyq top quryqtaldy, - 6 esirtki zerthanasy joıyldy. Esirtki jetkizýdiń 50 ishki arnasy jabyldy.
Óńirler boıynsha jarqyn mysaldar:
- Jambyl oblysynda 200 kılogramnan astam marıhýana tárkilendi.
- Almaty áýejaıynda Úndistan azamaty anyqtaldy. Ol elge 3 keli marıhýanany alyp kirmek bolǵan.
- Jezqazǵanda 100 keli marıhýana tárkilendi.
- Qyzylorda oblysynda salmaǵy 300 keli bolatyn 928 túp qarasora anyqtaldy.
"Zań men tártip" qaǵıdatyn iske asyrý aıasynda esirtki qylmysyna qarsy is-qımyl komıteti azamattardyń densaýlyǵyn qorǵaý jáne qoǵamdyq qaýipsizdikti nyǵaıtý boıynsha júıeli jumysty jalǵastyrady. Esirtki jolyna túsken árbir adam anyq túsinýi tıis: jazadan qutylý múmkin emes.