Almaty qalasynyń Túrksib aýdanyndaǵy №11 órt sóndirý bóliminiń qyzmetkerlerine arnalǵan mańyzdy aqparattyq-túsindirý sharasy ótti.
Bul shara Saıahat saýda ortalyǵynda uıymdastyrylyp, radıomunara arqyly kópshilikke taratyldy, dep habarlaıdy aqshamnews.kz.
İs-sharanyń basty maqsaty – dinı ekstremızm men terorızmniń aldyn alý arqyly memlekettik qurylym qyzmetkerleriniń dinı jáne quqyqtyq saýattylyǵyn arttyrý boldy.
Sharany Almaty qalasynyń aqparattyq-túsindirý tobynyń múshesi, dintaný magıstri Madına Serikqyzy Alımgojınova júrgizdi. Óz sózinde ol Qazaqstan Respýblıkasynyń Konstıtýsıasy men din salasyna qatysty zańnamalyq aktilerge toqtalyp, memlekettik qyzmetkerlerdiń dinı saýattylyǵy eldegi turaqtylyqtyń kepili ekenin atap ótti.
Alımgojınova dáris barysynda tyńdaýshylarǵa dinı senim bostandyǵy men dinı ekstremızm arasyndaǵy aıyrmashylyqty túsindirip, naqty mysaldar arqyly destrýktıvti aǵymdardyń áreket etý tetikterin kórsetti. Onyń aıtýynsha, radıkaldy ıdeıalar kóp jaǵdaıda adamnyń quqyqtyq jáne rýhanı daıynsyzdyǵyn paıdalana otyryp, teris baǵytqa burýǵa tyrysady.
Dáris barysynda qatysýshylarǵa teris dinı aǵymdardyń qoǵamǵa tóndiretin qaýipteri týraly arnaıy beınematerıal kórsetildi. Atalmysh rolıkterde ekstremıstik uıymdardyń azamattardy qalaı aldaıtyny jáne olardan qalaı saqtaný kerektigi naqty mysaldarmen berildi.
Sonymen qatar, dintanýshy maman teris aqparat taratatyn tulǵalarmen baılanys ornatýdan aýlaq bolýdy, dinı mazmundaǵy aqparattardy tek resmı kózderden alýdy usyndy. Qyzmettik mindetin atqaryp júrgen tulǵalar úshin bul – kásibı ǵana emes, adamgershilik turǵydan da mańyzdy qaǵıdat.
Shara sońynda qatysýshylar uıymdastyrylǵan dáristiń mazmuny men berilgen aqparattyń ózektiligine erekshe toqtaldy. Órt sóndirý qyzmetkerleri úshin qoǵamdyq qaýipsizdik pen ishki turaqtylyqty saqtaý – kúndelikti mindetterdiń biri. Osy oraıda dinı jáne quqyqtyq turǵydan aqparattaný olardyń qyzmetine tikeleı áser etetini sózsiz.
Almaty qalasynyń Túrksib aýdanyndaǵy №11 órt sóndirý bóliminde ótken bul aqparattyq dáris — dinı ekstremızm men terorızmniń aldyn alý baǵytynda jasalyp jatqan júıeli jumystyń bir bóligi. Memlekettik qyzmetkerlerdiń dinı saýattylyǵyn arttyrý – qoǵam qaýipsizdigin qamtamasyz etýdiń mańyzdy qadamy. Osyndaı sharalar quqyqtyq mádenıetti nyǵaıtyp, radıkaldy ıdeologıalarǵa qarsy turatyn turaqty ımýnıtet qalyptastyrady.