Almatyda jastardyń quqyqtyq sanasyn arttyrýǵa, azamattyq jaýapkershilik qalyptastyrýǵa jáne zańǵa qurmet mádenıetin nyǵaıtýǵa baǵyttalǵan keshendi baǵdarlama iske asyrylyp jatyr. Joba Almaty qalasy Jastar saıasaty basqarmasynyń bastamasymen, «Zań men tártip» ıdeologemasyn iske asyrý jónindegi 2025-2030 jyldarǵa arnalǵan is-qımyl jospary aıasynda qolǵa alynǵan.
Baǵdarlama quqyq buzýshylyqtyń aldyn alý, sybaılas jemqorlyqqa qarsy mádenıetti damytý jáne jastardyń belsendi azamattyq ustanymyn qalyptastyrýdy qamtıdy. Bıyl jyl basynan beri qalada 330-dan astam túrli formattaǵy is-shara uıymdastyrylyp, olarǵa 20 myńnan astam jas qatysty.
İs-sharalar qatarynda «NarkoSTOP» aksıalary, profılaktıkalyq reıdter, «Zań jáne jastar: sanaly azamat mádenıeti» atty kezdesýler, dóńgelek ústelder, quqyqtyq dárister, semınarlar, pikirtalastar, case-chempıonattar, vıktorınalar, quqyqtyq kvızder, fotokvester men onlaın-aksıalar ótti. İs-sharalar komúnıtı ortalyqtarda, joǵary oqý oryndary men kolejderde, stýdentter úıinde jáne onlaın platformalarda uıymdastyryldy.
Joǵary oqý oryndary men kolejderde depýtattar, zańgerler jáne medıatorlar qatysqan 30-dan astam dáris, semınar jáne dóńgelek ústel ótkizildi. Sondaı-aq, ál-Farabı atyndaǵy QazUÝ bazasynda sybaılas jemqorlyqtyń aldyn alýǵa baǵyttalǵan «Ýnıversıtet – jemqorlyqsyz» jobasy júzege asyryldy.
«Zań men tártip – bul tyıymdar júıesi emes, eń aldymen jastardyń kúndelikti ómirindegi jaýapkershilik pen sanaly tańdaý. Bizdiń mindet – jastarǵa zańdy túsindirý ǵana emes, ony ómirlik qundylyq retinde qabyldaýǵa jaǵdaı jasaý», – dedi Almaty qalasy Jastar saıasaty basqarmasynyń basshysy Azız Kajdenbek.
Sonymen qatar, «NarkoSTOP» jobasy aıasynda zańǵa qurmet pen jaýapkershilik qundylyqtaryn nasıhattaıtyn vertıkaldy hıkaıa iske qosyldy. Búgingi tańda eki serıa jaryq kórip, áleýmettik jeliler arqyly keńinen taralyp jatyr.
Jastar saıasaty basqarmasy sondaı-aq, «Antıkorrýpsıalyq eriktilik» jáne «Adal Urpaq» jobalaryn júzege asyryp otyr. Alataý aýdanynda 300-den astam belsendi jasty biriktirgen front keńse jumys isteıdi, onyń 100-den astamy turaqty negizde qyzmet atqarady. Joba aıasynda 20-dan astam monıtorıń, 30-dan astam kóshpeli keńes ótkizilip, adaldyq pen ádilettilikti beıneleıtin kólemdi mýral salyndy.
Budan bólek, Jetisý aýdanynda «Ádilet» jastar qozǵalysyn qurý jumystary bastaldy. Qozǵalys quqyqtyq mádenıetti damytýǵa, zańdylyq pen ádilet qundylyqtaryn nyǵaıtýǵa jáne sybaılas jemqorlyqqa tózbeýshilik qaǵıdattaryn qalyptastyrýǵa baǵyttalǵan.
Osylaısha, «Zań men tártip» ıdeologemasyn ilgeriletý Almatyda jastarmen birge júrgiziletin júıeli jumystyń mańyzdy baǵytyna aınalyp, quqyqtyq saýatty, jaýapty ári belsendi jas urpaq qalyptastyrýǵa negiz bolyp otyr.