Almaty qalasynda 2026 jyldan bastap buryn saqtandyrylmaǵan 60 myńnan astam turǵyn jergilikti búdjet esebinen mindetti áleýmettik medısınalyq saqtandyrý (MÁMS) júıesine qosylady. Óńirlik komýnıkasıalar qyzmetinde «Áleýmettik medısınalyq saqtandyrý qory» KEAQ Almaty qalalyq fılıalynyń dırektory Muhamedjan İlás osylaı dep málimdedi.
Onyń aıtýynsha, qazir Almatyda shamamen 2,3 mln adam tursa, olardyń 1,9 mıllıony (82%) saqtandyrylǵan mártebege ıe eken. Qala turǵyndarynyń shamamen 444 myńy qazir osy MÁMS júıesinen tys qalǵan.
«Saqtandyrylmaǵandardyń qatarynda D men E sanatyna jatatyn, ıaǵnı jaǵdaıy qıyn jáne shuǵyl deńgeıdegi azamattar bar. Bular ómirde qıyndyqqa tap bolǵan shamamen 95 myń qala turǵyny. Olardyń tabysy joq, bolsa da óte tómen, kúnkórisine jetpeıdi, sondyqtan olar memlekettiń qoldaýyna qatty muqtaj», – deıdi ol.
2026 jyly osy sanattaǵy medısınalyq kómekti turaqty paıdalanatyn 34 myń adam úshin MÁMS jarnasyn jergilikti búdjetten tóleı bastamaq.
Sonymen qatar, resmı túrde tirkelgen 28 myń jumyssyz azamat úshin de jarnany jergilikti búdjettiń esebinen tóleıdi.
«Esepke qaraǵanda, 2026 jyly atalǵan sanattardaǵy adamdarǵa jarna tóleýge ketetin shyǵyn 6,9 mlrd teńgeden asady. Bir adamǵa aı saıynǵy jarna – 9189 teńge. Bul rette osy sanattaǵy barlyq azamattar avtomatty túrde saqtandyrylyp, jarnalar medısınalyq kómekke naqty júgingen adamdarǵa tólenetin bolady», – dep atap ótti Muhamedjan İlás.
Keler jylǵa qańtardan bastap osy sanattaǵy turǵyndarǵa MÁMS júıesinde dárigerlik kómek alýǵa quqyǵyn rastaıtyn SMS-habarlama kele bastaıdy.