16 tamyzda Ál-Farabı atyndaǵy Qazaq ulttyq ýnıversıtetinde jazýshy, jýrnalıs, aýdarmashy Bıgeldi Ǵabdýllınniń 70 jyldyq mereıtoıyna oraı shyǵarmashylyq kesh ótti.
Bıgeldi Qaıyrdosuly Ǵabdýllın – 40 jyldan astam eńbek jolynda birqatar mańyzdy redaktorlyq jáne qoǵamdyq qyzmetterdi atqaryp, qazaq ádebıetin el ishinde de, shetelde de keńinen nasıhattaýǵa belsene atsalysqan qoǵam qaıratkeri. Onyń eńbegi ulttyq jáne halyqaralyq deńgeıde joǵary baǵalandy.
Byltyr ol 2022 jylǵy qańtar oqıǵalaryna arnalǵan «Qańtar-22: Sátsiz memlekettik tóńkeris jáne ulttyń oıanýy» atty kitabyn kópshilikke tanystyrdy. Bıyl kóktemde Máskeýde «Maral» jáne «SIZO» atty kitaptarynyń tusaýkeseri ótti. Bul eńbekter ádebı ortada keńinen talqylanyp, qoǵamda pikirtalas týdyrǵany belgili.
Qazaqstan Jazýshylar odaǵy basqarmasynyń tóraǵasy, jazýshy Mereke Qulkenovtyń moderatorlyǵymen ótken sharada Bıgeldi Ǵabdýllınniń ómiri men shyǵarmashylyǵy jóninde birqatar estelikter aıtyldy.
– 1955 jyly 31 shildede qazaqtyń qara balasy dúnıege keldi. Sol buırabas bozbala osydan 44 jyl buryn QazUÝ-dyń jýrnalısıka fakúltetin bitirip, úlken ómirge baǵyt aldy. Bul jyldardan beri qaraı qazaqtyń belgili pýblısısi, jazýshysy, aýdarmashysy, qoǵam qaıratkeri Bıgeldi Qaıyrdosuly Ǵabdýllın degen úlken tulǵany kóz aldymyzda qalyptastyrdy. Búgin sol azamattyń týǵan kúnin toılaǵaly otyrmyz. «Kazahstanskaıa pravdada», Qazaqstan Jazýshylar odaǵynda úlken jumys atqardy. Sol kezdiń ózinde problemalyq maqalalardy jazýǵa qalyptasqan erekshe jýrnalıs bolatyn. Oljas Súleımenovtyń tusynda Qazaqstan Jazýshylar odaǵynyń keńesshisi boldy. Máskeýden oqyp kelse de, qazaq jýrnalısıkasy men ádebıetinen alysqa ketken joq. Qazaqtyń bar máselesine aralasqan bir pýblısıs bolsa, ol – Bıgeldi Ǵabdýllın, – dedi Mereke Qulkenov.
Shara barysynda Almaty qalasy Mádenıet basqarmasynyń basshysy Ǵanı Maılybaev Almaty qalasynyń ákimi Darhan Satybaldynyń quttyqtaý hatyn oqydy:
«Qurmetti Bıgeldi Qaıyrdosuly, sizdiń ómirińizdiń eleýli belesi – 70 jasqa tolý mereıtoıyńyzben quttyqtaımyn! Osynaý mereıli beleske siz jurtqa keńinen tanymal qarymdy qalamger, maıtalman jýrnalıs, kórnekti qoǵam qaıratkeri retinde úlken rýhanı qazynamen, zor abyroımen jetip otyrsyz. Bozbala shaqtan qalamdy serik etip, shyǵarmashylyqpen úzdiksiz aınalysyp kelesiz. Bul – eń jemisti jyldardyń nátıjesi. Kóptegen kórkem týyndylar, mazmundy aýdarma eńbekter, qoǵamdyq kókeıkesti máselelerdi kótergen ótkir kósemsózder, jańa formatty zamanaýı sıpattaǵy birneshe baspa jobalar, gazetter men saıttar. Olar arqyly ulttyq múdde, adamgershilik, asyl qundylyqtardyń damýy men órkendeýine, táýelsizdiktiń tuǵyryn nyǵaıtýǵa ózindik úles qostyńyz. Ásirese, zamanaýı qazaq jýrnalısıkasyn qalyptastyrýǵa qosqan úlesińiz orasan zor. Siz jetekshilik etip, negizin qalaǵan «Novoe pokolenıe», «HHİ vek», «Central Asia Monitor» basylymdarynyń aqparattyq keńistikte ózgeshe qubylys bolyp, qoǵamdyq oı men sanany qozǵaýǵa úlken kúsh-jiger jumsaǵany elge aıan. Qazirgi tańda halyqaralyq PEN-klýbqa jetekshilik etip, qazaq ádebıetiniń álemdik deńgeıdegi órisin keńeıtýge aıanbaı atsalysyp júrsiz. Qalamyńyzben de, qaıratkerligińizben de halyqqa qaltqysyz qyzmet etip, árdaıym abyroı tórinen kórine berińiz. Mereıli belesińizben taǵy da quttyqtaı otyryp, denińizge saýlyq, uzaq ǵumyr, isińizge bereke tileımin»,–delingen hatta.
Jazýshy, Halyqaralyq «Alash» ádebı syılyǵynyń ıegeri Qanseıit Ábdezuly qaıratkerdiń bolmysyna qysqasha toqtalyp, Ál-Farabı atyndaǵy Qazaq ulttyq ýnıversıtetiniń rektory Janseıit Qanseıitulynyń quttyqtaýyn oqyǵannan keıin, arnaıy syılyqty tabystady.
Shyǵarmashylyq kesh barysynda jınalǵan jurt juldyzdy sáttiń kýási boldy. QR Memlekettik syılyǵynyń laýreaty, aqyn, jýrnalıs, qoǵam qaıratkeri Ulyqbek Esdáýlet Bıgeldi Ǵabdýllınniń Túrksoı Jazýshylar odaǵyna múshelikke qabyldanǵanyn aıtty. Bir qyzyǵy, kesh moderatory, Qazaqstan Jazýshylar odaǵynyń tóraǵasy Mereke Qulkenov te atalǵan odaqtyń quryltaı múshesi atandy.
«…Zaman basqa bolsa da,
Adam basqa bolsa da
Jarqyn ómir súrýge,
Qushtar bolǵan sonshama.
Túısiginiń ár sátin,
Ustar bolǵan sonshama.
…Oıaý bolsań, tynbadyń,
Qyryp saldyń qyzmetti.
Uıqyda da bos jatpaı,
Oı sapyrdyń túsińde…», – degen óleń joldary oqylǵan soń, Bıgeldi Ǵabdýllın ózinen jyly lebizin aıamaǵan, qoldan kelgenshe qoldaý bildirip, qýanyshynda janynan tabylǵan qaýymǵa erekshe yqylasyn bildirdi.
– Meniń júregimniń eń tereńinde – sizdersizder. Jas kezimde adamnyń óz-ózin «adam» qylý úshin jaqsy oqý keregin túsindim. Olımpıada chempıony bola almaıtynymdy túsingen soń, jýrnalısıkany qolǵa aldym. Shynaıy jas júrekte bolady. Jastarǵa qarap, qalamymnyń áli ushtalatynyna senemin, – dedi Bıgeldi Ǵabdýllın.