Mádenıet jáne aqparat mınıstrligi sý tasqynyna qarsy is-sharalar jáne onyń zardaptaryn joıý jónindegi respýblıkalyq shtab aıasynda zardap shekkenderge kómek kórsetý jumysyn jalǵastyrýda.
Sý tasqynyna qarsy is-sharalar bastalǵannan beri mınıstrlik «Kúshimiz birlikte» aksıasyn bastady. Aksıaǵa Ulttyq volonterler jelisi, volonterlik jáne jastar uıymdary, dinı, etnomádenı jáne qaıyrymdylyq uıymdary ókilderi qoldaý kórsetti, dep habarlaıdy Almaty-akshamy.kz QR Mádenıet jáne aqparat mınıstrligine silteme jasap.
Barlyq óńirde jedel volonterlik shtabtar qurylyp, olardyń jumysyna 50 myńnan astam volonter tartyldy.
Zardap shekkenderge kómek kórsetýdi jáne eriktilerdi jer-jerge bólip, úılestirý úshin biryńǵaı baılanys ortalyǵy (+7 708 706 4242) jumys isteıdi. Sý tasqynyna qarsy is-sharalar bastalǵannan beri oblystardan 1000-nan astam qońyraý túsken.
Alǵashqy kúnderden bastap, volonterler birlesip ázirlengen ózara áreket etý algorıtmine sáıkes, óńirlik tótenshe jaǵdaılar departamentterine kómek kórsetip jatyr.
Volonterler TJD-men birlesip, sý basqan aýmaqtardan azamattardy evakýasıalaý boıynsha jumys júrgizýde, azyq-túlik pen birinshi kezektegi qajetti zattardy jetkizýge atsalysyp, zardap shekken azamattarǵa alǵashqy kómek kórsetip jatyr.
Sondaı-aq Ulttyq volonterler jelisi sarapshylarmen birlesip, muqtaj azamattarǵa psıhologıalyq jáne zańgerlik kómek uıymdastyrdy.
Gýmanıtarlyq kómek jınaý pýnktteri 16 óńirde jumys isteıdi: Astana, Almaty, Shymkent, Atyraý, Aqtóbe, Aqmola, Almaty, Jambyl, Qostanaı, Qyzylorda, Batys Qazaqstan, Mańǵystaý, Pavlodar, Shyǵys Qazaqstan, Túrkistan oblystary jáne Jetisý oblystary. Volonterler 10 520 tonna gýmanıtarlyq kómek jınady. 8905 tonna zardap shekken aımaqtarǵa jetkizildi. Gýmanıtarlyq kómektiń qalǵan bóligi jaqyn arada jiberiledi.