Úkimet otyrysynda Air Astana prezıdenti Pıter Foster ushaq bıletiniń baǵasy qalaı esepteletinin jáne bıletti qalaı arzanyraq satyp alýǵa bolatynyn aıtyp berdi, dep habarlaıdy Almaty-akshamy.kz.
Ol Fly Arystan-daǵy baǵa belgileý serpindi ekenin jáne mundaı tájirıbeni barlyq álemdik tasymaldaýshy qoldanatynyn aıtty.
«Baǵany, tarıfterdi, biz aıtatyn 13 qosalqy klasty naryq belgileıdi. Bul neni bildiredi? Bireý bıletti erterek brondasa, satyp alsa, biz soǵurlym tómen tarıf usyna alamyz. Sonymen qatar satyp alǵan kúnge de baılanysty. Josparlaý ýaqytyna da baılanysty. Eger bılet juma túni suranystyń joǵary sátinde alynsa, árıne, tarıf joǵaryraq bolady. Biraq bul shyǵynǵa baılanysty baǵa modeli emes. Bul tek naryqqa, suranysqa baılanysty dınamıka. Bul standartty halyqaralyq tarıf saıasaty, búkil álemde qoldanylady jáne tek naryqqa táýeldi»,-deıdi Air Astana prezıdenti.
Onyń aıtýynsha, Fly Arystan suranys az kezde shyǵynǵa batady. Óıtkeni bılet baǵasy tómendeıdi. Al kompanıa qyzmetkerleriniń jalaqysy burynǵysynsha qalady.
«Biraq suranys joǵary bolǵan kezde, tarıfter de joǵary bolyp, tasymaldaýshynyń paıda tabýyna múmkindik bolady», - dedi Pıter Foster.
Kompanıa prezıdenti tarıfke negizdelgen saıasat máselesi jurtshylyqtyń kóp nazaryn aýdaryp, kóp suraq týǵyzatynyna kelisti. Biraq, onyń aıtýynsha, avıakompanıa ózi jumys isteıtin jaǵdaıda qoldan kelgenniń bárin jasap jatyr.
«Biz kúshti ınflásıalyq qysymmen jumys istep jatyrmyz. Degenmen jol júrý aqysyn barynsha tómen ustaý úshin barlyq sharany qoldanyp jatyrmyz. İshki tarıfterde eshqandaı qozǵalys nemese ózgeris jasaǵan joqpyz. Fly Arystan ishki tarıfterdiń 54%-yn 14 000 teńgeden tómen satady. Air Astana 47%-yn 20 000 teńgeden tómen satady. Negizi Fly Arystan-nyń byltyr satqan ortasha tarıfterine qarasańyz, barlyǵy 49 dollar. Fly Arystan ashylǵanǵa deıin 2019 jyldyń konteksinde, Air Astana-nyń ishki reısterge ortasha tarıfi 81 dollar boldy»,- dep túsindirdi Pıter Foster.
Onyń aıtýynsha, Qazaqstannyń ishki naryǵy 2020 jyly aıtarlyqtaı quldyraý bolǵanyna qaramastan, óte joǵary qarqynmen damyp keledi. IATA statısıkasyna sáıkes, bizdiń el qazir álemde eń jyldam damyp jatqan ishki tasymaldaý naryǵyna ıe.