QR Eńbek jáne halyqty áleýmettik qorǵaý mınıstri Svetlana Jaqypova Ulytaý oblysyna jumys sapary aıasynda óńir basshysy Dastan Ryspekovpen kezdesý jáne oblys aktıvimen keńes ótkizdi. Kezdesýler barysynda vedomstvo engizgen sıfrlyq sheshimderdi qoldaný esebinen áleýmettik-eńbek salasyndaǵy memlekettik qoldaý sharalarynyń tıimdiligi men ataýlylyǵyn arttyrýdyń túıindi máseleleri talqylandy.
Oblys ákimimen kezdesý barysynda Memleket basshysynyń halyqty jumyspen qamtý jáne áleýmettik qoldaý, kásiporyndardaǵy eńbek qaýipsizdigi jáne eńbekti qorǵaý, ómir súrý sapasyn arttyrý jáne múgedektigi bar adamdar úshin kedergisiz orta qurý jónindegi tapsyrmalaryn iske asyrý máselelerine erekshe nazar aýdaryldy.
Aktıvpen ótken keńeste Svetlana Jaqypova Eńbek mınıstrligi engizgen sıfrlyq quraldardyń múmkindikterin kórsetti. Atap aıtqanda, ol memlekettik ınvestısıalardyń tıimdiligin arttyrýǵa jáne sapaly josparlaýǵa arnalǵan jobalardyń ınovasıalyq navıgatory týraly egjeı-tegjeıli aıtyp berdi. Júıe kadrlarǵa degen qajettilikti boljaýǵa, ınvestısıalar kólemi, jobalardy iske asyrý kezeńderi jáne jumys oryndaryn qurý boıynsha naqty kórsetkishter týraly aqparat alýǵa múmkindik beredi.
«Osylaısha, biz óńirlerge óz jobalaryn iske asyrýǵa jáne halyqty nátıjeli jumyspen qamtýdy qamtamasyz etýge kómek kórsetkimiz keledi», – dep atap ótti Eńbek mınıstrliginiń basshysy.
Otbasynyń sıfrlyq kartasy (budan ári – OSK) memlekettik organdarǵa memlekettik qoldaýǵa muqtaj qazaqstandyqtardy anyqtaýǵa jáne qajetti sharalardy jedel qabyldaýǵa, áleýmettik saıasattyń orta jáne uzaq merzimdi mindetteri men baǵyttaryn aıqyndaýǵa múmkindik beredi. Sondaı-aq, OSK azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyly ekendigi týraly kúndelikti «elektrondyq habarlama» bolyp tabylady. Qazirgi ýaqytta Otbasynyń sıfrlyq kartasy qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 11 túrin resimdeýge múmkindik beredi.
Bul rette OSK-men uqsas túrde Eńbek táýekelderiniń sıfrlyq kartasy ázirlendi jáne engizildi, bul qyzmetkerlerge tıisti eńbek jaǵdaılary men jalaqy tóleýdi qamtamasyz etý monıtorıńin júrgizýge, yqtımal eńbek janjaldaryna ýaqtyly den qoıýǵa jáne olarǵa jol bermeý jóninde sharalar qabyldaýǵa múmkindik beretin bolady.
Eńbek mınıstrliginiń basshysy osy jáne ózge de sıfrlyq sheshimder azamattardyń eńbek quqyqtaryn jáne memlekettik kepildikterge teń qol jetkizýdi, halyqqa qoldaý sharalaryn kórsetý kezinde ashyqtyq pen áleýmettik ádilettilikti qamtamasyz etýge baǵyttalǵanyn atap ótti.