Vırýs áli joǵalyp ketpedi
Ulybrıtanıada kovıdtiń jańa shtamy anyqtaldy. Alǵash Úndistanda shyǵyp, Tumandy Albıonda taraı bastaǵan jańa shtamm — “Arktýrdyń” juqtyrý qaýiptiligi óte joǵary deıdi mamandar. Buǵan qosa, ol antıdenelerge óte tózimdi bolyp keledi, dep habarlaıdy Almaty-akshamy.kz.
Úndistanda “Arktýrdy” juqtyrǵandardyń sany 60 myńnan asyp otyr. Densaýlyq saqtaý salasyna basshylyq etetin sheneýnikter jaǵdaıdy ýshyqtyryp almaý úshin, eldiń keıbir shtattarynda maska taǵýdy mindetteýde. Vırýs alǵash qańtar aıynda anyqtalǵanymen, álem boıynsha endi ǵana keńinen taraı bastady. Dúnıejúzilik densaýlyq saqtaý uıymyndaǵylar jaǵdaıdy jiti qadaǵalap otyrǵanyn aıtady.
QazAqparattyń jazýynsha, Ulybrıtanıada ázirge “Arktýrdy” juqtyrǵandar kóp emes. Biraq vırýsologtar Tumandy Albıonda turatyndardyń basym kópshiligi kovıdke qarsy vaksına saldyrǵanyna qaramastan, jaǵdaı kúrdelenip ketýi múmkin dep alańdaýshylyq bildirip otyr. Óıtkeni jańa vırýstyń antıdenelerge tózimdiligi óte joǵary eken.
«Brıtanıalyqtar saqtyq sharalary týraly umytqan syńaıly. Bizge, shynymen de, aýany súzgiden ótkizetin tıisti maskalar taǵý kerek. Bólmelerdegi aýanyń sapasyn jaqsartyp, jeldetip otyrý kerek», - deıdi Lıds ýnıversıtetiniń profesor-vırýsology Stıven Grıffın.
Tynys alýdyń qıyndaýy jáne jótel sıaqty kovıdtiń negizgi belgileri “Arktýrǵa” da tıesili. Biraq oǵan endi keıbir balalar arasynda konúnktıvıt pen kózdiń bylshyqtanyp, jabysýy sıaqty sımptomdar qosylyp otyr. Konúnktıvıt - kózdiń qyzarýyna, qyshýyna jáne isinýine alyp keletin ınfeksıa. Ol buryn kovıd sımptomy retinde qarastyrylatyn, biraq sırek kezdesetin.
«Jańa nusqanyń paıda bolýy bizge vırýstyń áli eshqaıda joǵalyp ketpegenin jáne bıologıasy áli tiri ekenin anyq kórsetedi. “Arktýr” aǵzanyń ımmýnologıalyq qorǵanysynyń keıbir bólikterin aınalyp ótýge qabiletti. Jáne jaqyn arada búkil álemge taralýy múmkin», - deıdi Ekseter ýnıversıtetiniń Juqpaly aýrýlar boıynsha bóliminiń aǵa oqytýshysy Bharat Pankhanıa.
Vırýs ázirge Sıngapýr, Avstralıa jáne AQSH sıaqty 22 elde anyqtalyp otyr. Ulybrıtanıada Arktýrdy juqtyrǵandardyń sany 50-ge jýyq. Naýqastardyń aýrýy asqynǵany týraly ázirge derek joq. Jańa shtamdy tereńinen zertteý ǵalymdarǵa qıyn bolyp otyr. Óıtkeni Ulttyq statısıka qyzmeti koronavırýs týraly aqparat jınaýdy toqtatqan. Iaǵnı genomdyq qadaǵalaý júrgizilmeı keledi. Al derekterdiń jetimsizdigi ǵalymdardyń qyraǵylyǵyn joıady deıdi mamandar.