Búgin Ulttyq quryltaıǵa 3 jyl toldy. Buǵan oraı ál-Farabı atyndaǵy Qazaq Ulttyq ýnıversıtetiniń jýrnalısıka fakúlteti dekany Qanat Áýesbaı taldaý jasady, - dep habarlaıdy Aqshamnews.kz tilshisi.
Qanat Áýesbaıdyń aıtýynsha, 3 jylda ulttyq quryltaı qoǵamdyq ınstıtýt retinde tıimdiligin kórsetti.
"Halyq únine qulaq asatyn memleket" aıasynda qurylǵany keshe ǵana sıaqty edi. 3 jylda kóp sharýanyń basy qaıyrylypty. Moıyndaý lázim, Ulttyq quryltaı qoǵamdyq ınstıtýt retinde tıimdiligin kórsetti. Kórsetip te keledi. Quryltaı aıasynda "Qandaı ister atqaryldy?" degen ómirsheń suraqqa qysqa qaıyryp, naqty aıtsam:
- Ulttyq quryltaı bılik pen halyq arasyndaǵy tıimi zor shynaıy dıalog alańyna aınaldy. Qoǵamnyń túrli toptaryn, saıası partıalar, úkimettik emes uıymdar, bıznes-qaýymdastyqtar jáne sarapshylar qoǵamdastyǵy ókilderin biriktirdi.
- Saıası reformalarǵa yqpal etti. Rasyn aıtý kerek, Ulttyq quryltaı elimizdegi aýqymdy saıası reformalardy iske asyrýǵa belsendi atsalysty. Naqty aıtqanda, jalpyhalyqtyq referendým arqyly Ata Zańymyzǵa ózgeris endi. Parlamenttiń quzyreti keńeıdi, Úkimet jaýapkershiligi artty. Adam quqyqtaryn qorǵaý júıesi jaqsaryp, Konstıtýsıalyq Sot quryldy.
- Jergilikti bılikti jańǵyrdy. Ulttyq quryltaı qoldaýymen jergilikti bılik tarmaǵy da mańyzdy ózgeristi bastan ótkerdi. Sońǵy úsh jylda aýyl ákimderiniń 72 paıyzy jańardy. Onyń úshten biri buryn memlekettik qyzmette bolmaǵan azamattar eken. Pılottyq joba retinde 45 aýdan jáne oblystyq mańyzy bar qala ákimderi saılandy. Bıyl barlyq aýdan ákimin halyq tikeleı saılaıtyn boldy", - dedi ol.
Sondaı-aq, Qanat Áýesbaı zańnamalyq bastamalarǵa toqtaldy. Ulttyq quryltaıda kóterilgen bastamalar aıasynda 16 zań qabyldanypty.
Olar:
- "Respýblıka kúni" ulttyq mereke mártebesine ıe boldy.
- "Túrkistan qalasynyń erekshe mártebesi týraly" zań qabyldandy.
- "Memlekettik jastar saıasaty týraly" zańǵa túzetýler engizildi.
- Jumysshy mamandyqtarynyń mártebesin kóterý úshin 9 qurmetti ataq boıynsha túzetý engizildi.
- Turmystaǵy zorlyq-zombylyq qylmys retinde tanyldy, pedofılderge qatysty jaza qataıtyldy.
- "Mıtıńiler týraly demokratıalyq zań" qabyldandy.
- Partıalyq saılaý tizimine áıelder men jastar úshin 30% kvota engizildi.
"Quryltaı qoǵamdy biriktirý jáne jalpyulttyq qundylyqty damytýǵa basymdyq berdi. "Balalar kitaphanasy" jobasy iske asty, kitap oqý mádenıetin qalyptastyrýǵa mán berildi. 3 jylda 1300 bilim ordasyn jańǵyrtý, onyń ishinde 900 aýyldyq mektepti jańǵyrtý josparlanyp otyr. "Aýylda densaýlyq saqtaýdy jańǵyrtý" ulttyq jobasy aıasynda 188 medısınalyq nysan salynyp jatyr eken", - deıdi ol.
Qoǵamdyq qaýipsizdik jáne tártip: Ulttyq quryltaı quqyq qorǵaý jáne zańdylyqty nyǵaıtý baǵytynda da jumys júrdi. Turmystaǵy zorlyq-zombylyqqa qarsy kúres, balalar men áıelderdiń quqyqtaryn qorǵaý máselesi keń aýqymda talqylandy. Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary bekidi. Jastar sanasyn ýalaǵan veıpti elge ákelýge, óndirýge, satýǵa jáne taratýǵa tyıym salý týraly zań qabyldandy.
"Toqeterin aıtqanda, Ulttyq quryltaı – Qazaqstan qoǵamyn ortaq maqsatqa jumyldyryp, jalpyhalyqtyq jańǵyrýdyń sımvolyna aınalǵany ras. Qalaı bolǵanda da shyǵar kúndeı shyndyq osy", - dedi Qanat Áýesbaı.
Qanat Áýesbaı