Jyldyń sońyna qaraı ınflásıa 16-18% aralyǵynda bolady.
Qazaqstannyń Ulttyq bank mamandary aldaǵy ýaqytta eldegi ınflásıa deńgeıi qandaı bolatynyn aıtty, dep habarlaıdy Almaty-akshamy.kz.
Inflásıaǵa qatysty aqparat Ulttyq banktiń arnaıy ázirlegen baıandamasynda kórsetilgen.
«Ulttyq Bank «Aqsha-kredıt saıasaty týraly baıandama. Qyrkúıek 2022» jarıalady. Baıandamada boljamnyń alǵysharttary, bazalyq jáne boljamnyń balamaly senarıler boıynsha makroekonomıkalyq jaǵdaıdyń damý perspektıvalary, qazirgi makroekonomıkalyq jaǵdaılar berilgen. Sonymen birge qujatta aqsha, valúta jáne qarjy naryqtaryndaǵy jaǵdaıǵa taldaý jasalǵan»,- delingen Ulttyq banktiń baspasóz qyzmetiniń habarlamasynda.
Ótken boljamdy raýndtyń qorytyndysy boıynsha, jarıalanǵan ınflásıaǵa qatysty aldyńǵy baǵalaý kóterilý jaǵyna qaraı birshama qaıta qaraldy. 2022 jyldyń sońyna qaraı ınflásıa 16-18% aralyǵynda qalyptasady.
«Qysqa merzimdi kezeńde ınflásıa 2023 jylǵy aqpanda óziniń eń joǵary mánine jetip, eki tańbaly bolyp qalady. Bul birqatar azyq-túlik ónimderiniń, sondaı-aq azyq-túlikke jatpaıtyn taýarlardyń, birinshi kezekte, joǵary ımporttyq quramdas bóligi bar azyq-túlikke jatpaıtyn taýarlardyń jalǵasyp otyrǵan baǵasynyń ósýin, sondaı-aq saqtalyp otyrǵan joǵary bazalyq ınflásıany bildiretin bolady»,- deıdi QR Ulttyq bankiniń Aqsha-kredıt saıasaty departamenti dırektorynyń orynbasary Denıs Chernávskıı.
Budan ári 2023 jyldyń qorytyndysy boıynsha, ınflásıa 7,5-9,5%-ǵa deıin birtindep baıaýlaıdy dep kútilýde. Tómendeý úrdisi kúsheıe beredi, sóıtip, 2024 jyldyń sońyna qaraı ınflásıa 5,5-7,5% deńgeıinde bolady dep boljanyp otyr.
Ulttyq Banktiń boljamdaryna sáıkes, Qazaqstandaǵy ekonomıkalyq belsendilik dınamıkasy 2022 jyly 2,5%-3,5% dálizinde bolady. 2023 jyly belgisizdiktiń jalpy deńgeıiniń tómendeýi aıasynda Qazaqstan ekonomıkasynyń ósýi 4%-5% deıin jedeldeıdi. İshki suranys fıskaldyq yntalandyrýmen qoldaý kórsetiletin ekonomıkalyq belsendiliktiń jetekshisi bolady. Sondaı-aq, elde munaı óndirýdiń kútiletin ulǵaıýyna baılanysty eksport JİÓ ósiminiń qosymsha faktory bolady.
Aldyńǵy boljamdy raýndpen salystyrǵanda, ınflásıanyń jedeldeý táýekelderi birshama tómendedi, alaıda, álemde geosaıası shıelenis saqtalýy sebebinen joǵary bolyp qalyp otyr.
Álemdegi kúrdeli geosaıası jaǵdaı Qazaqstannyń makroekonomıkalyq kórsetkishteri boljamdarynyń alǵysharttaryna joǵary belgisizdik engizýdi jalǵastyrýda. Bul ınflásıanyń boljamdyq mánderinen aýytqý táýekelderin joǵary deńgeıde saqtaýǵa sebepshi bolady.