Osydan týra 85 jyl buryn 8 jeltoqsan kúni Ahmet Baıtursynuly atý jazasyna kesildi.
Tarıhı derekterge zer salsaq, atyshýly "úshtiktiń" ǵulama ǵalymdy atý týraly alǵashqy sheshimi 1930 jyldyń 4 sáýirinde shyqqan bolatyn. Keıin bul sheshim birneshe ret ózgertilip, tipti Ahmet Baıtursynulyna orys zıalylarynyń ózi arasha túsedi. Osylaısha ol aıdaý men qýǵynnyń arasynda adam tózgisiz jaǵdaıda ómir súrse de, 1937 jylǵa deıin qazaq múddesine qyzmet etýge múmkindik alady. 1937 jyly 8 qazanda sońǵy ret tutqyndalyp, 8 jeltoqsanda atý jazasyna kesildi.
Bıyl alash aıbozynyń týǵanyna 150 jyl tolǵany UNESCO kóleminde atap ótildi. Sol mereıtoıdyń logıkalyq túıini Ahmet Baıtursynulynyń atylǵan kúnimen túıindelmekshi.
«Ult ustazy Ahmet Baıtursynulynyń 150 jyldyǵynyń qorytyndy jıyny retinde Almatydaǵy Ulttyq kitaphanada onyń 12 tomdyq shyǵarmalar jınaǵynyń tusaýkeseri ótedi. Mundaǵy maqsat – ult ustazy shyǵarmalaryn nasıhatttap, alash ardaqtysynyń jazyqsyz atylǵan kúnin eske alý, rýhyna duǵa baǵyshtaý. Sharany Almaty qalasy Mýzeıler birlestigi, QR Ulttyq kitaphanasy men Ahmet Baıtursynuly «Til — qural» ǵylymı zertteý ortalyǵy» ótkizedi - deıdi Ahmet Baıtursynuly memorıaldy mýzeı úıiniń dırektory Raıhan Imahanbet.