Keler jyly ult ustazy Ahmet Baıtursynulynyń týǵanyna 150 jyl tolmaq.
Memlekettik hatshy Qyrymbek Kósherbaevtyń tóraǵalyǵymen ult ustazy Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi memlekettik komısıanyń alǵashqy otyrysy ótti, dep habarlaıdy Almaty-akshamy.kz
Otyrysta 2022 jyly toılanatyn mereıtoıdy halyqaralyq deńgeıde, IýNESKO aıasynda atap ótý jáne daıyndyq is-sharalaryn uıymdastyrý máseleleri qaraldy.
Komısıa tóraǵasy Qyrymbek Kósherbaev Alash ardaqtysy, reformator ǵalymnyń eldi aǵartý jumystaryndaǵy róli, til men ádebıet ǵylymdarynyń negizin salýdaǵy zor eńbegine toqtaldy. Ahmet Baıtursynuly ultymyzdyń uly tulǵalarynyń biri, halqymyzdyń beıbit te berekeli ómir súrýi úshin aıanbaı eńbek etken, sol jolda basyn báıgege tigip, «tar jol, taıǵaq keshýden» ótken tuǵyrly qaıratker ekenin aıtty. Sonymen qatar Alash balasynyń saýatyn ashyp, elimizdi órkenıetti memleketterdiń qataryna qosýdy maqsat tutqanyn, «Jurt uqpasa, uqpasyn jabyqpaımyn. El – búginshil, Meniki – erteń úshin» degen Ahmet Baıtursynuly bolashaq urpaq úshin qyzmet etkenin atap ótti.
«Ahmet Baıtursynuly – ulttyq damýdyń talaı jyl tot basyp qaraýsyz qalǵan tegershigin aınaldyryp, úzdiksiz qozǵalysqa qosyp bergen erteginiń erlerindeı eren tulǵa. Týǵan halqynyń rýhanı jańǵyrýyn tap ondaı bilip, sol jolda qaltqysyz qyzmet etip, máńgi eskirmeıtin mol mura qosqan qaıratker qazaq dalasynda kemde kem», - dedi Qyrymbek Eleýuly.
Qazaqstan Respýblıkasy Bilim jáne ǵylym mınıstrligi Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi jalpyrespýblıkalyq jospar jobasyn tanystyrdy. Atalǵan josparda Ahmet Baıtursynulynyń qyzmetin jan-jaqty tanytýǵa baǵyttalǵan halyqaralyq, respýblıkalyq jáne aımaqtyq is-sharalar qamtylǵan.
Otyrysta QR Bilim jáne ǵylym mınıstri Asqat Aımaǵambetov, Qostanaı oblysynyń ákimi Arhımed Muhambetov, QR Syrtqy ister mınıstriniń birinshi orynbasary Shahrat Nuryshev, L.N. Gýmılev atyndaǵy Eýrazıa ulttyq ýnıversıtetiniń rektory Erlan Sydyqov baıandama jasady.
Ult ustazynyń mereıtoıyn atap ótý barysynda elimizdiń oqý oryndarynda ǵylymı-praktıkalyq konferensıalar, oqýlar, t.b is-sharalar uıymdastyrylady. TÚRKSOI uıymy músheleriniń qatysýymen halyqaralyq Túrkologıalyq kongres ótkizý josparlanǵan. Alash qaıratkeriniń shyǵarmashylyǵy boıynsha bilim berý oryndarynda ashyq sabaqtar, taqyryptyq konkýrstar ótkiziledi.
Sonymen qatar ult ustazynyń tańdamaly eńbekterin orys, aǵylshyn jáne túrik tilderine aýdarý, ǵylymı eńbekteriniń tolyq jınaǵynyń 12 tomdyǵyn baspadan shyǵarý, Ahmet Baıtursynulynyń jáne «Alash» qozǵalysynyń basqa da qaıratkerleriniń eńbekterin shetelderdiń arhıvterinen izdestirip, ǵylymı aınalymǵa engizý boıynsha zertteý jumystary júrgiziledi.
Ahmet Baıtursynulynyń ómiri týraly kórkem fılm túsirý, mýzeı-úıine ǵylymı-restavrasıalyq jumystar júrgizý de josparǵa endi.
Uly tulǵanyń 150 jyldyq mereıtoıyn IýNESKO aıasynda atap ótý máselesi bıylǵy qarasha aıynda ótetin atalǵan uıymnyń Bas konferensıasynda qaralý josparlanýda.
Komısıa otyrysynyń qorytyndysy boıynsha Qyrymbek Kósherbaev Ahmet Baıtursynulynyń 150 jyldyq mereıtoıyn joǵary uıymdastyrýshylyq deńgeıde daıyndaý jáne ótkizý boıynsha memlekettik organdarǵa tıisti tapsyrmalar berdi.